Surxondaryo viloyati Sho'rchi tumani hokimligi

Assalomu alaykum, hurmatli Sho‘rchi tuman fuqarolari !

So‘nggi yillarda aholi, ayniqsa yoshlar va xotin-qizlarning bandligini ta’minlash, tadbirkorlikni rivojlantirish, orzu - intilishlarini to‘liq ro‘yobga chiqarish, bir so‘z bilan aytganda, ularni har tomonlama qo‘llab-quvvatlash borasida keng ko‘lamli islohotlar olib  borilmoqda.

Yaratilgan imkoniyatlardan to‘g‘ri foydalanib, ilm - fan va sportda yuksak natijalarga erishayotgan hamda nafaqat yurtimiz balki, butun dunyoga mashhur maktab o‘quvchilari, yoshlar va o‘rnak bo‘la oladigan qizlarimiz borligi quvonarli, albatta.

Ma’lumki, hozirgi kunda internet jahonshumul tarmog‘idan yurtimiz, shu jumladan butun vohamizning barcha hududlarida  keng  foydalanilmoqda. Bu fuqarolarga davlat xizmatlarini ko‘rsatish, banklardan onlayn foydalanish, xarid qilish, shuningdek tezkor yetkazib berish kabi ko‘plab sohalarda imkoniyatlar yaratilishiga hamda ularning vaqtini tejashga olib kelmoqda.

Lekin, internet tarmog‘idan noto‘g‘ri foydalanish natijasida fuqarolar, ayniqsa yoshlarning ko‘p vaqti foydasiz va keraksiz kontentlarni ko‘rish uchun sarflanmoqda, hattoki jinoyatlardan jabrlanishiga sabab bo‘lmoqda.

Oqibatda, ayrim shaxslar jamiyatda yurish - turish qoidalarini buzish, oson yo‘l bilan boylik orttirish, fuqarolarni aldab, ishonchiga kirish va boshqa noqonuniy yo‘llar orqali milliy qadriyatlarimizga putur yetkazayotgani juda  ham  achinarli. Bu kabi salbiy holatlar kelib chiqmasligi uchun barcha idora va tashkilotlar hamda xalqimiz bilan birgalikda avvalo, mahallalarda xavfsiz muhitni yaratish hamda jinoyatchilik profilaktikasiga alohida e’tibor qaratilmoqda.

Olib borilgan profilaktik choralar natijasida mahallalarda oldini olish mumkin bo‘lgan jinoyatlar salmog‘i  kamayishiga  erishildi. Biroq, yaratilgan keng imkoniyatlarga qaramasdan viloyatimizda voyaga yetmaganlar, yoshlar, ayollar va ishsizlar tomonidan jinoyatlar sodir etildi.

Jumladan, joriy yilning 7 oyida tumanimizda voyaga yetmagan shaxslar tomonidan 2 ta o‘g‘rilik jinoyatlari  sodir  etildi.

Mazkur jinoyatlar o‘quv maskanlaridagi o‘quvchilar hissasiga to‘g‘ri kelgani tumanimizda ta’lim - tarbiya ishlari to‘g‘ri tashkil etilmagani hamda ta’lim muassasada  nazorat  qoniqarsiz  ekanligini  ko‘rsatdi.

Davlatimiz rahbari jismonan sog‘lom, ruhan va aqlan rivojlangan, mustaqil fikrlaydigan, Vatanga sodiq, qat’iy nuqtai nazarga ega yoshlarni tarbiyalash, demokratik islohotlarni chuqurlashtirish va fuqarolik jamiyatini rivojlantirish jarayonida ularning ijtimoiy faolligini oshirishni  ustuvor  vazifa  etib  belgilab  berganlar.

Islohotlar natijasida yaratilgan shart - sharoitlardan juda ko‘plab yoshlar unumli foydalanib, avvalo o‘z oilasi va yurtimiz rivojiga o‘zining beqiyos hissasini qo‘shmoqda.

Shunga qaramasdan ayrim yoshlar noto‘g‘ri yo‘lga kirib, jinoyat  sodir  etmoqda.

O‘tgan 7 oyda yoshlar tomonidan 13 ta jinoyat sodir etilib, ularning aksariyat qismi guruhlar hamda ishlamaydigan va o‘qimaydiganlar hissasiga  to‘g‘ri  keladi.

Xalqimiz azaldan xotin - qizlarimizga hurmat ko‘rsatib keladi, bu davlat siyosatida ham o‘z aksini topib, oilalardagi muhitni yaxshilash, ayniqsa, ayollar muammolarini o‘rganib,  hal  etish  mexanizmi  yaratilgan.

Ammo, o‘tgan davrda ayollar tomonidan o‘g‘rilik va transport vositalaridan foydalanish, xavfsizlik qoidalarini buzish kabi jinoyatlar sodir etildi.

Hurmatli  tumanimiz aaholisi!

Shu sababli, xalqimiz bilan birga berilgan imkoniyatlardan to‘liq foydalanish, aholini har tomonlama qo‘llab - quvvatlash, jinoyatchilik profilaktikasini kuchay-tirish orqali yanada ijobiy natijalarga erishishimiz zarur.

Xabaringiz bor, mas’ul idoralar va keng jamoatchilik bilan hamkorlikda jinoyatlarni oldini olish, tumanda kriminogen vaziyat barqarorligini ta’minlash bo‘yicha kuchaytirilgan ish tartibi joriy etilgan.

Bu esa jinoyatchilik profilaktikasi, ayniqsa har bir jinoyat uchun jazo muqarrarligini ta’minlash hamda jinoyat sodir etgan shaxslarni qisqa vaqtda aniqlashga salmoqli  hissa  qo‘shmoqda.

Shu  maqsadda  bundan  keyin  ham :

- jinoyat va huquqbuzarlik sodir etishga moyil bo‘lgan shaxslar toifasi bilan manzilli profilaktik tadbirlar kuchaytiriladi;

-sodir etilgan jinoyatlar har kuni tezkor tahlil qilib  boriladi;

- kunlik so‘rov va nazorat tizimi izchillik bilan davom  ettiriladi.

Aziz Sho‘rchi tumani fuqarolari !

Jinoyatchilikning oldini olish va profilaktikasi samaradorligini oshirishda mahalla ahli, ta’lim - tarbiyaga mas’ullar, umuman har bir fuqaroning amaliy yordami  hamda  hamkorligi muhim ahamiyatga ega.

Shu sababli, mahallalarni jinoyatdan holi, tinch va xavfsiz hududga aylantirishga har birimiz o‘z hissamizni qo‘shib, birgalikda harakat qilsak, ko‘zlangan maqsadga albatta erishamiz.

Kelingizlar, barchamiz shu yo‘lda muhtaram Prezidentimizga yelkadosh bo‘lib, qonun ustuvor, adolat  hukmron bo‘lgan jamiyatni birgalikda barpo etaylik!