Tuman IIB boshlig‘i Nurimbek Narzullayevning mart oyida tuman aholisiga murojaati
2026-03-30 13:25:00 / Rahbariyatning bayonotlari va nutqlari
Hurmatli fuqarolar!
Bugungi kunda jamiyatimizda qonuniylik va huquq-tartibotni ta’minlash, jinoyatchilik va huquqbuzarliklarning oldini olish eng ustuvor vazifalardan biri hisoblanadi. Shu bois, tumanimizda tinchlik va osoyishtalikni saqlash, fuqarolar xavfsizligini ta’minlash barchamizning umumiy burchimizdir.
O‘zbekiston Respublikasi Prezidenti Shavkat Mirziyoyev rahnamoligida mamlakatimizda qonuniylikni mustahkamlash, huquqbuzarliklarning barvaqt oldini olish, aholi bilan ochiq muloqot qilish orqali muammolarni joyida hal etishga alohida e’tibor qaratilmoqda. Bu borada O‘zbekiston Respublikasi Ichki ishlar vazirligi tizimi tomonidan profilaktika ishlarini kuchaytirish, jamoat tartibini saqlash va huquqiy madaniyatni yuksaltirishga qaratilgan qator chora-tadbirlar amalga oshirilmoqda.
Aziz tumanimiz aholisi!
Jinoyatchilikka qarshi kurashish faqat huquqni muhofaza qiluvchi organlar vazifasi emas. Bu — har bir oila, har bir mahalla, har bir fuqaroning daxldorligi va mas’uliyatini talab etadigan umumxalq ishidir. Ayniqsa, yoshlar o‘rtasida nazoratni kuchaytirish, ularning bo‘sh vaqtlarini mazmunli tashkil etish, internet va ijtimoiy tarmoqlardan to‘g‘ri foydalanish madaniyatini shakllantirish dolzarb ahamiyat kasb etmoqda.
Shu munosabat bilan sizlarni quyidagilarga chaqirib qolaman:
qonun talablariga qat’iy rioya qilishga;
har qanday huquqbuzarlik holatlariga befarq bo‘lmaslikka;
mahalla va profilaktika inspektorlari bilan yaqin hamkorlik qilishga;
farzandlar tarbiyasiga alohida e’tibor qaratishga;
shubhali holatlar haqida o‘z vaqtida tegishli idoralarga xabar berishga.
Tuman hududida jinoyatchilik va huquqbuzarliklarning oldini olish maqsadida profilaktik tadbirlar, targ‘ibot uchrashuvlari, “Xavfsiz mahalla” tamoyili asosida manzilli ishlar izchil davom ettiriladi. Har bir murojaat, har bir taklif e’tiborsiz qoldirilmaydi.
Biz barchamiz birgalikda harakat qilsakgina tumanimizni xavfsiz, osoyishta va farovon hududga aylantira olamiz. Qonun ustuvorligi ta’minlangan jamiyatda tinchlik, taraqqiyot va barqarorlik bo‘ladi.
Tumanimiz tinchligi va osoyishtaligi yo‘lida hamkorlikka chaqirib qolaman.
Hurmat bilan,
Tuman IIB boshlig‘i N.Narzullayev