Yoshlar yutug‘i - yangi imkoniyatlar eshigi
2026-03-05 16:50:00 / Yangiliklar
Sho‘rchi tumani hokimi Akbarali Ishmurzoyev iqtidorli o‘quvchilar bilan uchrashdi. Ular orasida Sho‘rchi tumanidagi ixtisoslashtirilgan maktabning 10-“A” sinf o‘quvchisi Shabnam Abdumo‘minova ham bor. Yosh bo‘lishiga qaramasdan, u bilim va iqtidori bilan tengdoshlari orasida alohida ajralib turadi.
Shabnam Abdumo‘minova xalqaro va milliy miqyosdagi yutuqlari bilan e’tiborga sazovor. U xalqaro IELTS imtihonidan 6,5 ballni qo‘lga kiritgan. Shuningdek, milliy sertifikat bo‘yicha O‘zbek tili va adabiyoti fanidan A daraja sohibasi hisoblanadi. Bundan tashqari, u Hindiston davlatidagi "Manav Rachna" universiteti tomonidan tashkil etilayotgan konferensiyada ishtirok etish uchun rasmiy taklif ham olgan.
Yosh bo‘lishiga qaramay bir qator yutuqlarga erishayotgan Shabnam “Ibrat debati”ning Sho‘rchi tumanidagi koordinatori sifatida yoshlarni munozara va fikr almashish madaniyatiga chorlab kelmoqda. Shu bilan birga, ixtisoslashtirilgan maktabning “Zakovat” klubi terma jamoasining sardori sifatida ham faoliyat yuritadi.
E’tiborlisi, u hali 10-sinf o‘quvchisi bo‘lishiga qaramasdan, oliy ta’lim muassasalariga kirish test sinovlari darajasidagi bilimlarini namoyon etib, 167 ballni qo‘lga kiritishga muvaffaq bo‘lgan.
Uchrashuv davomida tuman hokimi Akbarali Ishmurzoyev iqtidorli yoshlarning yutuqlarini alohida e’tirof etdi. Bunday bilimli, intilishga to‘la yoshlar Yangi O‘zbekistonning ertangi kunini barpo etishda muhim o‘rin tutishini ta’kidlab, ularga kelgusidagi o‘qish va ilmiy faoliyatida omad tiladi.