Shofirkon tumanida ijtimoiy soha obyektlari uchun 88,227 milliard so‘m mablag‘ yo‘naltirilgan
2026-10-13 15:25:00 / Yangiliklar
Jumladan, umumta’lim maktablarini mukammal ta’mirlash uchun Xo'ja Orif mahallasidagi 1-sonli, Do‘rmon mahallasidagi 27-sonli, Talisangobod mahallasidagi 32-sonli hamda Horin mahallasidagi 48-sonli maktablarga jami 63 milliard 795 million so‘m mablag‘ ajratilgan.
Maktabgacha ta’lim sohasida Sultonobod mahallasidagi 18-sonli, Shodlik mahallasidagi 19-sonli hamda Nurafshon mahallasidagi 30-sonli davlat maktabgacha ta’lim tashkilotlarini rekonstruksiya qilish uchun jami 18 milliard 246 million so‘m mablag‘ nazarda tutilgan.
Xususan, tuman hokimi Mo‘min Amonov Nurafshon mahallasidagi 30-sonli davlat maktabgacha ta’lim tashkilotida amalga oshirilayotgan qurilish ishlari bilan yaqindan tanishdi. Mazkur loyiha uchun qariyb 4 milliard 750 million so‘m mablag‘ ajratilgan bo‘lib, 90 nafar bolaga mo‘ljallangan muassasada ta’lim-tarbiya olish uchun qulay shart-sharoitlar yaratish ko‘zda tutilgan.
Tibbiyot sohasida esa Jo‘sho'ra mahallasidagi 43-sonli oilaviy poliklinika filiali hamda Alisher Navoiy mahallasidagi Dodbog'ni oilaviy shifokorlik punktini mukammal ta’mirlash uchun jami 6 milliard 186 million so‘m mablag‘ ajratilgan.
Ushbu loyihalarning amalga oshirilishi natijasida ta’lim muassasalarida o‘quvchilar va tarbiyalanuvchilar uchun yanada qulay sharoitlar yaratilishi, tibbiyot muassasalarida esa aholiga ko‘rsatiladigan xizmatlar sifatini oshirish uchun imkoniyatlar kengayishi kutilmoqda.
Shofirkon tumanida ijtimoiy soha obyektlarini yangilashga qaratilayotgan e’tibor aholi farovonligini oshirish, zamonaviy infratuzilmani shakllantirish va hududni kompleks rivojlantirishga xizmat qiladi.