Buxoro viloyati Shofirkon tumani hokimligi

Yangi O‘zbekistonda inson qadri, uning salomatligi va farovon hayoti eng ustuvor masala sifatida e’tirof etilmoqda. Ayniqsa, yosh avlodni turli zararli illatlardan asrash, ularning bo‘sh vaqtini mazmunli tashkil etish, bilim olishi, kasb-hunar egallashi va sport bilan shug‘ullanishi uchun keng imkoniyatlar yaratish davlat siyosatining muhim yo‘nalishlaridan biridir.
Aziz yoshlar!
Sizlar Vatanimizning eng katta boyligi va ertangi kunimiz egalarisiz. Hayotda yuksak marralarni ko‘zlang, bilim oling, izlaning va o‘z ustingizda ishlang. Giyohvandlik va boshqa zararli odatlar insonning sog‘lig‘i, obro‘si, oilasi va kelajagini barbod qiladigan illat ekanligini hech qachon unutmang. Sizning eng katta kuchingiz — sog‘lom fikr, mustahkam iroda va ezgu maqsadlarga bo‘lgan intilishdir.
Hurmatli ota-onalar, ustozlar va mahalla faollari!
Farzandlarimiz tarbiyasi, ularning sog‘lom va barkamol voyaga yetishi barchamizning umumiy mas’uliyatimizdir. Yoshlarni e’tibor va mehr bilan qo‘llab-quvvatlash, ularni turli salbiy ta’sirlardan himoya qilish hamda sog‘lom turmush tarziga yo‘naltirish bugungi kunning eng dolzarb vazifalaridan hisoblanadi.
Shofirkon tumanida ham yoshlar o‘rtasida giyohvandlikning oldini olish, huquqiy madaniyatni yuksaltirish, sog‘lom turmush tarzini keng targ‘ib etish va profilaktik tadbirlarni kuchaytirish borasidagi ishlar izchil davom ettiriladi.
Barchangizni sog‘lom hayot tamoyillariga amal qilishga, giyohvandlik va boshqa zararli illatlarga nisbatan murosasiz bo‘lishga chaqiraman.
Yoshlarimizning baxtli kelajagi, oilalarimiz tinchligi va yurtimiz ravnaqi yo‘lida birgalikda harakat qilaylik!
Mo‘min Amonov,
Shofirkon tumani hokimi