Buxoro viloyati Shofirkon tumani hokimligi

Hududlar kesimida eng katta hajmdagi hosil Vardonze hududiga to‘g‘ri kelib, bu yerda 4499 tonna don qabul qilinishi belgilangan. Shuningdek, M.Chandir hududida 1904 tonna, Boqi Afzal hududida 1712 tonna hamda Do‘rmen hududida 1688 tonna bug‘doy qabul qilinadi.

Hosil taqdirini belgilovchi mas’ul pallada tumanda o‘rim jarayonlariga 20 ta zamonaviy kombayn jalb etilgan bo‘lib, ularda 40 nafar operator-mexanizator mehnat qilmoqda. Bugun ushbu texnikalarning mavsumoldi texnik ko‘rigi tashkil etildi.

Unda tuman hokimi Mo‘min Amonov, Qishloq xo‘jaligi vazirligi huzuridagi Agrosanoat majmui ustidan nazorat qilish inspeksiyasi (“Agroinspeksiya”) boshqarmasi boshlig‘i Vali Narziyev, Favqulodda vaziyatlar bo‘limi boshlig‘i Botir Husanov hamda bir qator mas’ullar va mexanizatorlar ishtirok etdi.

Ko‘rik davomida kombaynlarning texnik shayligi, yong‘in xavfsizligi qoidalariga qat’iy rioya qilish, har bir boshoqni nes-nobud qilmasdan yig‘ib olish masalalari muhokama qilindi. Ta’kidlanganidek, g‘alla — xalq rizqi, dehqonning bir yillik mashaqqatli mehnati samarasi. Shu bois har bir kilogramm donni asrab-avaylab yig‘ib olish bugungi kunning eng dolzarb vazifalaridan biridir.

Tadbir davomida tuman hokimi tomonidan g‘alla o‘rimida qatnashayotgan barcha mexanizatorlarga 2 million so‘mdan rag‘bat puli ajratilishi, mavsum davomida alohida jonbozlik ko‘rsatgan operatorlar esa qo‘shimcha ravishda taqdirlanishi ma’lum qilindi.

Shuningdek, mexanizatorlarga yog‘ va un mahsulotlari topshirilib, ularning samarali faoliyat olib borishi uchun zarur sharoitlar yaratib berilayotgani qayd etildi.

Bugun Shofirkonda har bir dala, har bir kombayn va har bir mexanizator zimmasida katta mas’uliyat mujassam. Chunki rizq-ro‘zimiz bo‘lgan g‘allani o‘z vaqtida yig‘ib olish — nafaqat iqtisodiy, balki xalq farovonligi va dasturxon to‘kinligining muhim omilidir.