Buxoro viloyati Shofirkon tumani hokimligi

Texnikumda 2025–2026 o‘quv yilida bir qator dolzarb va talab yuqori bo‘lgan yo‘nalishlar bo‘yicha ta’lim berilmoqda. Jumladan, avtomobillarni ta’mirlash va texnik xizmat ko‘rsatish, elektromontyorlik, tikuvchilik, axborot vositalari, buxgalteriya hisobi, kompyuter injenering, dasturiy injenering, payvandlash hamda axborot xavfsizligi yo‘nalishlari mavjud. Shuningdek, dual ta’lim tizimi asosida o‘quvchilar nazariy bilim bilan birga amaliy ko‘nikmalarni ham egallamoqda.
Texnikum o‘z faoliyati davomida qator yutuqlarga erishgan. Xususan, jami 25 nafar talaba umumta’lim sertifikatiga ega bo‘ldi. Bu esa o‘quvchilarning bilim darajasi va o‘qitish sifati yuqori ekanidan dalolat beradi.
Ta’kidlash joizki, texnikum binosi 2009-yilda rekonstruksiya qilingan bo‘lib, hozirgi kungacha qayta rekonstruksiya ishlari amalga oshirilmagan. Shunga qaramay, ta’lim jarayonlari zamon talablari asosida tashkil etilib kelinmoqda.
Mazkur ta’lim muassasasiga Soliyev Bahodir rahbarlik qilib kelmoqda. Uning boshqaruvi ostida texnikumda o‘quv jarayoni bilan bir qatorda amaliyotga ham alohida e’tibor qaratilgan. Xususan, avtomobilsozlik, elektromontyorlik, tikuvchilik hamda axborot texnologiyalari yo‘nalishlarida amaliy darslar muntazam tashkil etiladi.
Texnikumning boshqa kasb-hunar maktablaridan asosiy farqi — har bir yo‘nalishda raqamlashtirishga ustuvor ahamiyat berilib, natijalar aniq va samarali ko‘rsatkichlar orqali baholanadi.

Texnikumda faoliyat yuritayotgan tikuv sexi ham e’tiborga molik. Bu yerda 30 nafar yosh tikuvchilik kasbini o‘rganmoqda. Ustoz Ravshanova Mohichehra rahbarligida o‘quvchilar nafaqat kasb sirlarini o‘zlashtirmoqda, balki ishlab chiqarish jarayonida ham bevosita ishtirok etmoqda.
Tikuv sexida tayyorlanayotgan mahsulotlar hudud ehtiyojidan kelib chiqib realizatsiya qilinadi. Jumladan, mahsulotlarning 20 foizi mahallaga, 80 foizi esa tuman tibbiyot birlashmasi va maktabgacha ta’lim muassasalariga yetkazib beriladi.

Sex faoliyati natijasida olingan daromad esa qayta ishlab chiqarishga yo‘naltirilib, xom ashyo xaridi hamda moddiy-texnik bazani mustahkamlashga sarflanadi. Bundan tashqari, tikuv sexida 50 kVt quvvatga ega quyosh panellari o‘rnatilgan bo‘lib, tikuv mashinalari aynan shu energiya manbai orqali ishlaydi. Bu esa mahsulot tannarxining arzonlashishiga xizmat qilmoqda.
Shuningdek, tikuv sexi “Amirteks” MChJ bilan hamkorlikda faoliyat yuritib, hududdagi talab va ehtiyojlarga mos ravishda ishlab chiqarishni yo‘lga qo‘ygan.

Umuman olganda, Shofirkon Raqamli texnologiyalar texnikumi nafaqat bilim beruvchi maskan, balki yoshlarni hayotga tayyorlaydigan, ularga mustahkam kasb va barqaror kelajak sari yo‘l ochib berayotgan muhim ta’lim muassasasi hisoblanadi.