Buxoro viloyati Shofirkon tumani hokimligi

Yangi O‘zbekistonda “Inson qadri uchun” ezgu g‘oyasi davlatimiz siyosatining ustuvor yo‘nalishiga aylandi. Inson qadri ulug‘lanayotgan bunday tarixiy sharoitda qishloq, guzar va mahallalarimizda tinchlik va osoyishtalikni ta’minlash borasida barchamiz zimmasidagi mas’uliyatli vazifalar yanada ortib bormoqda. Davlatimiz rahbari ham “Davlat va xalq tayanadigan asosiy ustun — qonun, uning kuchini amalda namoyon etadigan eng samarali tizim esa ichki ishlar sohasi”, deya tizimga alohida e’tibor qaratib, bu sohadagi o‘zgarishlarning eng katta zamini — yurtimizdagi tinchlik-osoyishtalik ekanligini qayta-qayta ta’kidlab kelmoqdalar.

O‘zbekiston Respublikasi Prezidentining o‘tgan yil 3 yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish bo‘yicha chora-tadbirlar to‘g‘risida”gi PQ-1-son qarorining joylarda mukammal ijro etilishi natijasida mahallalarda jinoyatchilik qariyb 1,5 baravarga kamaydi. Mazkur qarorning mantiqiy davomi sifatida joriy yil 5-yanvar kuni “Respublika mahallalarida xavfsiz muhitni yaratish yo‘nalishida yaxlit, manzilli ishlash tizimini joriy etishga qaratilgan qo‘shimcha chora-tadbirlar to‘g‘risida”gi PQ-1 hamda “2026-yilda respublika mahallalarida jinoyatchilikning barvaqt profilaktikasi samaradorligini yanada oshirish bo‘yicha tashkiliy chora-tadbirlar to‘g‘risida”gi PQ-2-son qarorlari qabul qilindi. Ushbu normativ-huquqiy hujjatlar asosida hududlar va mahallalar mas’ullarga aniq biriktirildi.

Joriy yil 27-yanvar kuni o‘tkazilgan videoselektor yig‘ilishida davlatimiz rahbari quyidagilarni ta’kidladi: “Bugun davlat va jamiyat xavfsizligiga to‘g‘ridan-to‘g‘ri tahdid qiladigan to‘rtta yo‘nalish — uyushgan jinoyatchilik, giyohvandlik, kiberjinoyat hamda yashirin iqtisodiyot bo‘yicha ta’sirchan choralar belgilash uchun yig‘ildik. Bu muammolarning har biri alohida xavfli, lekin ularning birlashib harakat qilishi yanada jiddiy tahdidlarni yuzaga keltiradi. Butun jamiyatimiz bilan mana shu to‘rtta yo‘nalish bo‘yicha kurashishimiz kerak”.

2026-yil mart oyi davomida tuman hududida jami 55 ta jinoyat sodir etildi. Shundan 13 tasi oldi olinishi mumkin bo‘lgan, 42 tasi aniqlangan jinoyatlardir. Umuman olganda, jinoyatlar soni o‘tgan yilga nisbatan 17 foizga kamaydi. Biroq ayrim yo‘nalishlarda jinoyatchilik salmog‘i oshib bormoqda.

Bugungi kunda keng tarqalayotgan va alohida ehtiyotkorlik talab etiladigan sohalardan biri — internet orqali sodir etilayotgan o‘g‘irlik va firibgarlikdir. Ushbu jinoyatlar fuqarolarning ishonuvchanligidan foydalanib amalga oshirilmoqda. “Yutuq yutib oldingiz”, “Pulingizni ko‘paytirib beramiz”, “To‘ydan video”, “MIBdan qarzdorlik” kabi soxta xabarlar va APK fayllarga aslo ishonmang. Faqatgina mart oyining o‘zida axborot texnologiyalari sohasida 65 ta jinoyat sodir etilgan.

Shu sababli quyidagilarga alohida e’tibor qaratishingizni so‘raymiz:

• Telefon va gadjetlaringizga ikki bosqichli himoya o‘rnating;
• Plastik karta PIN-kodini begonalarga bermang;
• PIN-kodni kiritishda begonalardan ehtiyot bo‘ling;
• SMS-kodlarni hech kimga oshkor etmang;
• Bank ma’lumotlarini ijtimoiy tarmoqlar orqali yubormang;
• O‘zini bank xodimi deb tanishtirganlarga ishonmang;
• Shubhali qo‘ng‘iroqlar va xabarlarga aldanmang.

Bunday holatlarga duch kelsangiz, darhol “112” raqamiga murojaat qiling.

Yana bir dolzarb muammo — giyohvandlik va psixotrop moddalar bilan bog‘liq jinoyatlar. Bu illat ayniqsa yoshlar orasida keng tarqalmoqda. Afsuski, bunday jinoyatlar bugungi kunda internet orqali ham amalga oshirilmoqda.

Hurmatli ota-onalar! Farzandlaringizning xulq-atvoridagi o‘zgarishlarga befarq bo‘lmang. Zarur hollarda mutaxassislar yordamiga murojaat qiling.

Shuningdek, firibgarlik va o‘g‘irlik jinoyatlari ham dolzarb muammolardan biri bo‘lib qolmoqda. Xususan:

• Xonadonlarning qarovsiz qoldirilishi;
• Sifatsiz qulflardan foydalanish;
• Transport vositalarini nazoratsiz qoldirish;
• Chorva mollarning qarovsiz yurishi;

kabi holatlar jinoyat sodir etilishiga sharoit yaratmoqda.

Shu bois:

• Xonadonlarni qo‘riqlash tizimiga ulang;
• Videokuzatuv o‘rnating;
• Mol-mulkingizni ehtiyot qiling.

Hurmatli fuqarolar! Agar sizda huquqbuzarliklar haqida ma’lumot bo‘lsa, “102” raqamiga murojaat qiling. Sizning xabaringiz og‘ir jinoyatlarning oldini olishga xizmat qilishi mumkin.

Aziz tumandoshlar! Barchangizga mustahkam sog‘lik, xonadonlaringizga tinchlik va farovonlik tilayman. Yurtimizda tinchlik va barqarorlik doimo hukm sursin!

E’tiboringiz uchun rahmat!