Buxoro viloyati Shofirkon tumani hokimligi

O‘rganish davomida tumandagi Haydarobod, Chitgaron, Qoratepa, Do‘rman va Qahramon nasos stansiyalarining faoliyati ko‘zdan kechirildi. Mazkur nasos stansiyalari orqali 3 ming 500 gektardan ortiq qishloq xo‘jaligi maydonlarini suv bilan ta’minlash imkoniyati mavjud.

O‘rganishning birinchi manzili “Haydarobod” nasos stansiyasi bo‘ldi. Mazkur stansiya Amu–Buxoro irrigatsiya tizimlari havza boshqarmasi huzuridagi Nasos stansiyalari va energetika boshqarmasi tasarrufida faoliyat yuritadi. Stansiya 2013-yilda ishga tushirilgan bo‘lib, loyiha “Buxoromeliyoloyiha” tashkiloti tomonidan ishlab chiqilgan.

Nasos stansiyasida 3 ta nasos agregati mavjud bo‘lib, ularning umumiy quvvati 330 kVtni tashkil etadi. Suv chiqarish quvvati 1,5 m³/sekund bo‘lib, stansiya orqali 1800 gektar qishloq xo‘jaligi maydonlariga xizmat ko‘rsatiladi. Nasos markasi A50–GO–0,5/10, suv ko‘tarish balandligi 6 metrni tashkil etadi.

Keyingi manzil “Chitgaron” nasos stansiyasi bo‘ldi. Ushbu stansiya hududdagi sug‘oriladigan yerlarni suv bilan ta’minlashda muhim ahamiyat kasb etadi. Nasos stansiyasi 2017-yilda ishga tushirilgan bo‘lib, loyiha “Uzdavsuvloyiha” instituti tomonidan ishlab chiqilgan.

Mazkur stansiyada 2 ta nasos agregati o‘rnatilgan bo‘lib, ularning umumiy quvvati 220 kVtni tashkil etadi. Suv chiqarish quvvati 1,0 m³/sekund bo‘lib, stansiya orqali 350 gektar qishloq xo‘jaligi yerlariga suv yetkazib beriladi. Nasos markasi D2000–21, suv ko‘tarish balandligi 6,20 metrni tashkil etadi.

Navbatdagi o‘rganish manzili Qoratepa nasos stansiyasi bo‘ldi. Ushbu inshoot hududdagi qishloq xo‘jaligi maydonlarini suv bilan ta’minlashda muhim ahamiyat kasb etadi. Nasos stansiyasi orqali fermer xo‘jaliklari va dehqonlarning sug‘orish suvi bilan ta’minlanishi yo‘lga qo‘yilgan.

Mutasaddilar tomonidan stansiyaning texnik holati, nasos agregatlarining ishlash jarayoni hamda suv yetkazib berish tizimi batafsil ko‘zdan kechirildi. Mas’ullarga nasos stansiyalarining barqaror ishlashini ta’minlash, texnik xizmat ko‘rsatishni kuchaytirish hamda mavsum davomida uzluksiz faoliyat yuritishi yuzasidan tegishli topshiriqlar berildi.

Shuningdek, o‘rganish davomida Do‘rman va Qahramon nasos stansiyalari ham ko‘zdan kechirildi. Ushbu nasos stansiyalari ham hududdagi qishloq xo‘jaligi maydonlarini sug‘orish suvi bilan ta’minlashda muhim o‘rin tutadi.

Tuman hokimi tomonidan barcha nasos stansiyalarining mavsumga tayyorligi, texnik jihozlarning sozligi va ehtiyot choralarining ko‘rilishi alohida nazorat qilindi. Shu bilan birga, nasos stansiyalarining har qanday favqulodda vaziyatga tayyor turishi, nosozliklarning oldini olish hamda suv ta’minotining uzluksizligini ta’minlash bo‘yicha mas’ullarga aniq topshiriq va ko‘rsatmalar berildi.

Mazkur o‘rganishlar qishloq xo‘jaligi mavsumida fermer xo‘jaliklarini suv bilan barqaror ta’minlash hamda hosildorlikni yanada oshirishga xizmat qiladi.