Buxoro viloyati Shofirkon tumani hokimligi

Shofirkon tumanida ta’lim sifatini oshirish, iqtidorli yoshlarni qo‘llab-quvvatlash hamda nodavlat ta’lim muassasalari faoliyatini yanada rivojlantirishga alohida e’tibor qaratilmoqda. Shu maqsadda bugun Shofirkon tuman hokimi Mo‘min Amonov tomonidan tumanda faoliyat yuritayotgan “Ma’rifat chashmasi” nodavlat ta’lim tashkiloti faoliyati o‘rganildi.

Mazkur ta’lim maskani 2021-yilda tashkil etilgan bo‘lib, hozirgi kunda muassasaga Barnoyev Jasurbek Baxtiyorovich rahbarlik qilib kelmoqda. Ayni paytda markazda 170 nafar o‘quvchi tahsil olmoqda.

Ta’lim jarayoni bosqichma-bosqich yo‘lga qo‘yilgan bo‘lib, 1–4-sinflarda rus tili yo‘nalishida, 5–11-sinflarda esa o‘zbek tili yo‘nalishida ta’lim berilmoqda. Muassasada 26 nafar o‘qituvchi faoliyat olib boradi. Ularning 5 nafari oliy toifali, 5 nafari birinchi toifali, 12 nafari ikkinchi toifali, 4 nafari mutaxassis o‘qituvchilardir. Eng e’tiborlisi, o‘qituvchilarning barchasi o‘z yo‘nalishlari bo‘yicha milliy sertifikatlarga ega.

Ta’lim maskanining yutuqlari ham e’tiborga molik. Jumladan, o‘tgan yili 13 nafar bitiruvchining barchasi nufuzli oliy ta’lim muassasalariga o‘qishga qabul qilingan, ulardan 2 nafari imtihonlarsiz to‘g‘ridan-to‘g‘ri yo‘llanma asosida talabalikka qabul qilingan.

Joriy yilda esa 10 nafar bitiruvchi mavjud bo‘lib, ularning barchasi milliy sertifikatlarga ega. Shuningdek, 6 nafar o‘quvchi to‘g‘ridan-to‘g‘ri oliy ta’lim muassasalariga kirish uchun yo‘llanmalarni qo‘lga kiritgan.

Muassasa o‘quvchilari fan olimpiadalari va turli tanlovlarda ham faol ishtirok etib kelmoqda. Xususan, tabiiy fanlar yo‘nalishi bo‘yicha Al-Xorazmiy olimpiadasining tuman bosqichida muvaffaqiyatli ishtirok etib, viloyat bosqichiga yo‘llanmalarni qo‘lga kiritgan.

Shuningdek, o‘quvchilar individual yutuqlarga ham erishmoqda. Jumladan:

7-sinf o‘quvchisi Bo‘ronov Javlon tabiiy fanlar yo‘nalishida yuqori natijalarga erishgan;

8-sinf o‘quvchisi Zayniddinova Parizoda ingliz tili fanidan B2 darajadagi xalqaro sertifikatni qo‘lga kiritgan;

10-sinf o‘quvchisi Subxonova Madina esa SAT yo‘nalishi bo‘yicha 1200 ball to‘plab, xalqaro sertifikatga ega bo‘lgan.

Mazkur ta’lim maskani tasarrufida nodavlat maktabgacha ta’lim tashkiloti ham faoliyat yuritadi. Unda 4 ta guruhda rus va o‘zbek yo‘nalishlarida 100 nafar bolajon tarbiyalanmoqda. Tarbiyalanuvchilar uchun mental arifmetika, chet tillari, sport yo‘nalishida shaxmat va shashka to‘garaklari tashkil etilgan. Shuningdek, maktabgacha ta’lim muassasasida boshlang‘ich tayyorlov guruhlari ham faoliyat yuritib kelmoqda.

Tashrif davomida Shofirkon tuman hokimi Mo‘min Amonov muassasada yaratilgan sharoitlar, ta’lim jarayoni hamda o‘quvchilar erishayotgan natijalar bilan yaqindan tanishdi. Shuningdek, ta’lim markazi rahbari Jasurbek Barnoyev bilan ta’lim sifatini yanada oshirish, iqtidorli yoshlarni qo‘llab-quvvatlash hamda kelgusidagi rejalar yuzasidan muloqot o‘tkazildi.

Bugungi kunda “Ma’rifat chashmasi” nodavlat ta’lim tashkiloti Shofirkon tumani miqyosida o‘z o‘rniga ega, salohiyatli va natijador ta’lim maskani sifatida e’tirof etilmoqda.