Buxoro viloyati Shofirkon tumani hokimligi

Navbatdagi manzil Shofirkon tuman 2-son umumta’lim maktabi bo‘ldi. Mazkur maktab 1984-yilda qurilgan bo‘lib, hozirgi kunda ta’lim muassasasiga direktor Sharipova Rohat Zokirovna rahbarlik qilib kelmoqda.

Bugungi kunda maktabda 881 nafar o‘quvchiga 61 nafar o‘qituvchi ta’lim-tarbiya bermoqda. Pedagoglar tarkibi malakali mutaxassislardan iborat bo‘lib, ulardan 15 nafari oliy toifali, 21 nafari birinchi toifali, 13 nafari ikkinchi toifali o‘qituvchilardir.

Shuningdek, maktabda “Xalq ta’limi a’lochisi” ko‘krak nishoni bilan taqdirlangan tajribali ustozlar — Ergashev Asror Ashurovich, Xaydarova Xursand Subxonovna, Beysenbiyeva Madina Kajmuxanovna hamda Imomova Malohat Mahmudovna faoliyat olib bormoqda.

Ayni paytda maktabda 57 nafar bitiruvchi sinf o‘quvchilari tahsil olmoqda. Ularning 14 nafari ingliz tili bo‘yicha B2 hamda C1 darajadagi xalqaro sertifikatlarga ega. Bundan tashqari, matematika, rus tili, kimyo, biologiya va tarix fanlari bo‘yicha 15 nafar o‘quvchi turli sertifikatlarni qo‘lga kiritgan.

Ta’lim sifatini oshirish maqsadida maktabda xorijiy mutaxassis ham faoliyat yuritmoqda. Jumladan, Filippin davlatidan tashrif buyurgan ingliz tili o‘qituvchisi Mary Flor Advent Suarez-Gansit 2025-yil 16-dekabrdan buyon o‘quvchilarga ingliz tilidan saboq berib kelmoqda.

Maktab pedagoglari turli ko‘rik-tanlovlarda faol qatnashib, maktab, tuman va viloyat miqyosidagi tanlovlarda munosib ishtirok etib kelmoqda. Ular ko‘plab diplom va tashakkurnomalar bilan taqdirlangan. Shu bilan birga, o‘quvchilar ham fan olimpiadalarida faol ishtirok etib, tuman hamda viloyat bosqichlarida faxrli o‘rinlarni egallab kelmoqda.

Tashrif davomida Shofirkon tuman hokimi Mo‘min Amonov maktabda yaratilgan sharoitlar, ta’lim jarayoni hamda malakali ustozlar tomonidan o‘quvchi yoshlarga berilayotgan bilimlar bilan yaqindan tanishdi.

Uchrashuv yakunida ta’lim sifatini yanada oshirish, o‘quvchilarning bilim salohiyatini mustahkamlash hamda mavjud imkoniyatlardan samarali foydalanish bo‘yicha mas’ullarga tegishli topshiriq va tavsiyalar berildi.