Shofirkon tajribasi: Bir xonadonda besh daromad manbai va zamonaviy tadbirkorlik bo‘yicha amaliy seminar
2026-02-17 18:55:00 / Yangiliklar
Unda mahalla yettiligi, hududning xotin-qizlari ishtirok etdi.
Xususan, Gulsanam Rahmatova xonadoni bugun o‘ziga xos "ko‘p tarmoqli klaster"ni eslatadi.
Milliy qadriyatlarni daromad manbaiga aylantirgan xonadon bekalari bu yo‘nalishda ham o‘z mahoratlarini ko‘rsatmoqdalar.
Kaliforniya, Yangi Zelandiya va Gigant zotli 100 dan ortiq quyonlar parvarishlanmoqda, 150 ta asalari oilasidan yiliga 2 tonnadan ziyod mahsulot olinmoqda, 7 bosh sigir hamda 25 sotix tomorqadagi mo‘l hosil oilaning yillik daromadini 150–200 million so‘mga yetkazmoqda.
Tashrif doirasida faqat o‘rganish emas, balki amaliy tajriba almashishga ham alohida urg‘u berildi. Mazkur mahalla hududida quyonchilik faoliyatini yanada kengaytirish hamda olma va anor yetishtirish orqali yuqori daromad olish mavzusi maxsus o‘quv seminar markazida bo'ldi.
Seminarda soha mutaxassislari tomonidan anor va olma ko‘chatlarini parvarishlashning zamonaviy usullari, eksportbop mahsulot yetishtirish sirlari haqida batafsil ma’lumotlar berildi. Bu kabi o‘quvlar qishloq ayollari uchun nafaqat bilim, balki yangi tadbirkorlik g‘oyalarini shakllantirishda muhim turtki bo‘ldi.
Shuningdek, Gulsoda To‘rayeva kabi 25 yillik tajribaga ega tikuvchilarning faoliyati bilan tanishish jarayonida "ustoz-shogird" an’anasi asosida 100 dan ortiq xotin-qizlarning bandligi ta’minlangani yuqori baholandi. Uning quroqchilik san’ati va imtiyozli kredit orqali kengaygan tikuvchilik sexi mahallaning o‘sish nuqtalaridan biri sifatida qayd etildi.
Zulayho Mahkamova muloqot so‘ngida ta’kidlaganidek, Shofirkon tajribasi — bu mehnatsevarlik va davlat tomonidan berilayotgan imkoniyatlarning go‘zal uyg‘unligidir. Bunday xonadonlar nafaqat o‘z oilasini, balki butun mahallani farovonlikka yetaklaydi.