Buxoro viloyati Shofirkon tumani hokimligi

Anjumanda hududdagi ta’lim muassasalari pedagoglari, ilmiy izlanish olib borayotgan yoshlar, sport sohasida yuksak natijalarga erishgan qizlar, jamoatchilik vakillari hamda mas’ul tashkilotlar rahbarlari ishtirok etdi. Tadbirda Respublika Ma’naviyat va ma’rifat markazi Buxoro viloyati bo‘limi rahbari birinchi o‘rinbosari M. Safoyeva, Qorovulbozor tuman bo‘linmasi rahbari M. Jumayeva, Shofirkon tuman bo‘linmasi rahbari D. G‘afforova, tuman Oila va xotin-qizlar bo‘limi rahbari M. To‘latova, “Oqila ayollar” harakati a’zosi D. Sattorova, psixolog Z. Ashurova hamda tuman Madaniyat bo‘limi vakillari qatnashdi.

Tadbir davomida Yangi O‘zbekiston taraqqiyot strategiyasida belgilangan vazifalar ijrosi, xususan, ilm-fan va ta’lim sifatini oshirish, raqobatbardosh kadrlar tayyorlash, yoshlarning intellektual salohiyatini ro‘yobga chiqarish masalalari muhokama qilindi.
O‘zbekiston Respublikasi Prezidenti Shavkat Mirziyoyev Oliy Majlisga yo‘llagan Murojaatnomasida:
“Biz uchun eng katta boylik – bu bilimli va malakali yoshlarimizdir. Ilm-fan, ta’lim va innovatsiya taraqqiyotning asosiy drayveriga aylanishi shart,” deya ta’kidlagan edi.

Shuningdek, davlatimiz rahbari xotin-qizlarning jamiyat hayotidagi o‘rnini mustahkamlash masalasiga alohida to‘xtalib, ularning tashabbus va intilishlarini har tomonlama qo‘llab-quvvatlash ustuvor vazifa ekanini qayd etgan.
Anjumanda aynan shu maqsadlar – ayollarning ilmiy salohiyatini ro‘yobga chiqarish, yosh qizlarni ilm-fanga keng jalb etish, ularning innovatsion g‘oyalarini qo‘llab-quvvatlash masalalari yuzasidan fikr almashildi.
Tadbir yakunida faol xotin-qizlar va iqtidorli yoshlar e’tirof etilib, ilm yo‘lida izlanayotgan qizlarga amaliy tavsiyalar berildi.
Ilmli va ma’rifatli ayol – jamiyat taraqqiyoti, barqarorlik va farovonlikning mustahkam poydevoridir.