Buxoro viloyati Shofirkon tumani hokimligi

Fermer xo‘jaligi yiliga taxminan 97 200 litr sut ishlab chiqarish imkoniyatiga ega. Xo‘jalikda jami 115 bosh qizil cho‘l zotiga mansub chorva mavjud bo‘lib, shundan 36 bosh sigir, 20 boshdan ortiq otlar va 350 bosh qo‘y hamda echkilar parvarishlanmoqda. Bu ko‘rsatkichlar fermerlik ishlarining yuqori darajada tashkil etilganini ko‘rsatadi.

2025-2026 yillar uchun fermer xo‘jaligi tomonidan chorva qishlovi mavsumiga puxta tayyorgarlik ko‘rilgan. Qishlov mavsumini betalofat  o‘tkazish uchun zarur bo‘lgan ozuqa zahiralari sifatida 70 tonna beda, 95 tonna somon, 350 tonna senaj, 500 tonna silos, shuningdek, 100 tonnaga yaqin kuchli ozuqalar jamg‘arilgan.

Bu ozuqalar mollarni qish mavsumida sog‘lom va kuchli saqlashga xizmat qiladi hamda chorva mollaridan mahsulot olishda yuqori natijalarga erishishga imkon beradi.

Fermer xo‘jaligi o‘tgan yil yakunlari bo‘yicha 105 tonna sut va 7,5 tonna go‘sht ishlab chiqarib, mahalliy bozorlarga yo‘naltirgan. Bu ko‘rsatkichlar xo‘jalikning mahsuldorligi va bozor talablariga javob berishini ta’kidlaydi.

Fermer xo‘jalikning umumiy yer maydoni 57 gektarni tashkil etadi. Ushbu maydonning 19 gektarida 2026 yil hosili uchun g‘alla ekilgan, 3,5 gektar maydon paxta yetishtirish uchun shartnoma asosida ajratilgan, qolgan 34,5 gektar esa chorva mollari uchun ozuqa yetishtirishga yo‘naltirilgan.

Bugun fermer xo‘jalik hududida veterinariya va chorvachilikni rivojlantirish bo‘limining malakali mutaxassislari — Ikrom Nazarov va Murod Hikmatovlar tomonidan chorvachilik komplekslarida qish mavsumini betalofat o‘tkazish borasida o‘rganish ishlari olib borildi. Bu tadbirlar chorva sog‘lig‘i va qishki tayyorgarlik ishlarini yanada samarali tashkil etishga qaratilgan.

Hikmat Hasan fermer xo‘jaligi o‘z hududida qishloq xo‘jaligi sohasida barqaror rivojlanishni ta’minlab, yuqori sifatli chorva mollari va qishloq xo‘jaligi mahsulotlarini ishlab chiqarishga muvaffaqiyatli hissa qo‘shmoqda. Muntazam tayyorgarlik ishlari va veterinariya nazorati bilan fermerlik faoliyati yanada samarali davom etmoqda.