Buxoro viloyati Shofirkon tumani hokimligi

Bu haqda Maktabgacha va maktab ta’limi vazirligi huzuridagi Respublika “Kelajak” markazi Buxoro viloyati markazi rahbari Muhammadjon Kamildjanov Shofirkon tumaniga amalga oshirgan tashrifi davomida batafsil to‘xtalib o‘tdi.

Prezident qarori — maktabdan tashqari ta’limni tubdan yangilash sari muhim qadam

Muhammadjon Kamildjanovning ta’kidlashicha, Prezident qaroriga muvofiq maktabdan tashqari ta’lim tizimini rivojlantirishda quyidagi ustuvor vazifalar belgilangan:

— o‘quvchilarda zamonaviy va mehnat bozorida talab yuqori bo‘lgan kasblarga qiziqish uyg‘otish, interaktiv ta’lim muhiti orqali bolalarning ilmiy, texnik, ijodiy va sport yo‘nalishidagi salohiyatini yuzaga chiqarish;

— bolalarning yetakchilik qobiliyatlari va shaxsiy rivojlanishiga qaratilgan loyihalarni amalga oshirish, ularning tarixiy bilimlarini mustahkamlash, Vatanga sadoqat, milliy qadriyatlar va madaniy merosga hurmat ruhida tarbiyalash;

— maktabdan tashqari ta’lim tizimini zamon talablariga mos ravishda takomillashtirish, sohaga malakali mutaxassislar hamda xususiy sektorni jalb etish;

— kadrlarning kasbiy rivojlanishini qo‘llab-quvvatlash, boshqaruv tizimini takomillashtirish va ta’lim muassasalarining moddiy-texnika bazasini zamonaviy standartlar asosida rivojlantirish.

“Kelajak” markazlari oldidagi asosiy vazifalar

Uchrashuv davomida Respublika, Qoraqalpog‘iston Respublikasi, viloyatlar, Toshkent shahri hamda tuman (shahar) “Kelajak” markazlari zimmasiga yuklatilgan vazifalar ham keng yoritildi.

Xususan:
— maktabdan tashqari ta’lim tizimiga o‘quvchilarni keng jalb etish, zamonaviy va innovatsion yondashuv asosida turli to‘garaklarni tashkil etish;
— bolalar uchun barqaror, samarali va inklyuziv muhit yaratish, ularda yetakchilik, jamoada ishlash, faol fuqarolik pozitsiyasi va kommunikativ ko‘nikmalarni rivojlantirish;
— o‘quvchilarning tarixiy bilimlarini mustahkamlash, ularni Vatanga muhabbat va milliy qadriyatlarga hurmat ruhida tarbiyalash;
— ta’lim tashkilotlarida xalqaro tajribaga asoslangan holda to‘rt bosqichda “ijtimoiy-emotsional ta’lim” modelini joriy etish;
— “Kelajak” nomi ostida tarbiyaviy-axloqiy, ma’naviy-mafkuraviy, ijtimoiy-kommunikativ, ekologik va madaniy loyihalarni amalga oshirish.

Tizimdagi muhim yangiliklar

Prezident qarori ijrosi doirasida maktabdan tashqari ta’lim tizimida bir qator innovatsion yangiliklar joriy etilishi belgilangan. Jumladan:
— robototexnika, dizayn, IT, madaniyat va sport yo‘nalishlarida zamonaviy to‘garaklar yo‘lga qo‘yiladi;
— maktab va “Kelajak” markazlari o‘rtasida vertikal boshqaruv tizimi joriy etiladi;
— har bir o‘quvchi uchun elektron portfel shakllantiriladi;
— ta’lim jarayonini baholash va nazorat qilish uchun raqamli monitoring tizimi ishga tushiriladi.

Shofirkon “Kelajak” markazi — mustahkam tajriba va yuksak salohiyatga ega maskan

Tashrif doirasida Muhammadjon Kamildjanov Shofirkon “Kelajak” markazi faoliyati bilan yaqindan tanishib, markaz xodimlari va to‘garak rahbarlari bilan muloqot qildi. Prezident qarori yuzasidan tushuntirish ishlari olib borildi.

Shuningdek, tadbir davomida muhim tashkiliy masala e’lon qilinib, Buxoro viloyati Shofirkon tumanidagi “Barkamol avlod” bolalar maktabi direktori lavozimida samarali faoliyat yuritib kelgan Jumayev Nozim Nizomiddinovich Shofirkon “Kelajak” markazi rahbari etib tayinlangani o‘qib eshittirildi.

Ta’kidlash joizki, Shofirkon tumanidagi “Barkamol avlod” bolalar maktabi aynan Nozim Jumayev rahbarligi davrida respublika miqyosida eng yuqori natijalarga erishgan ta’lim muassasalaridan biriga aylandi. Turli fan olimpiadalari, ijodiy va texnik tanlovlar, sport musobaqalarida shofirkonlik yoshlar muntazam ravishda faxrli o‘rinlarni egallab, tuman nufuzini respublika darajasida munosib himoya qilib kelishdi.

Endilikda “Barkamol avlod” tajribasi va erishilgan yutuqlar “Kelajak” markazi faoliyatida yangi mazmun va zamonaviy yondashuvlar bilan davom ettirilishi, yoshlarning qobiliyatini ro‘yobga chiqarishda yanada katta imkoniyatlar yaratishi shubhasiz.