Buxoro viloyati Shofirkon tumani hokimligi

Shohista opa “Har bir oila – tadbirkor” dasturi doirasida berilgan imkoniyatlardan samarali foydalanib, imtiyozli kredit asosida 7,5 million so‘mga zamonaviy issiqxona qurdirgan. Issiqxonada dastlab pomidor nihollari parvarish qilinib, yil boshidayoq mo‘l hosil olingan. O‘rtacha 10 million so‘mlik hosil oilaning dastlabki yutug‘i bo‘ldi. Mart oyidan boshlab esa issiqxona ichida 10 tup banan va 12 ta papaya ko‘chatlari ekilgan. Ma’lumki, banan 14 oyda, papaya esa 8 oyda hosilga kiradi. Demak, yaqin oylarda ushbu tropik mevalardan ham mo‘l hosil olinishi kutilmoqda.

Bundan tashqari, Shohista opaning ikkinchi issiqxonasi yer osti qismida, 2 sotix maydonda joylashgan bo‘lib, unda limon daraxtlari parvarish qilinadi. Mazkur issiqxona uchun ham 10 million so‘m miqdorida imtiyozli kredit ajratilgan. Shu yilning o‘zida limondan 8 million so‘m daromad olingan bo‘lsa, hozirda ham limon hosili terib olinmoqda.

Xonadon tomorqasida 40 tup anor daraxti ham bo‘lib, undan yil davomida 15 million so‘m atrofida sof daromad ko‘rilgan. Mehnatsevar oila o‘z tomorqasining har bir qarichidan unumli foydalanib, nafaqat o‘z turmushini farovon qilmoqda, balki mahalladagi boshqa fuqarolarga ham o‘rnak bo‘lmoqda.

Shohista opaning oilasida nafaqat dehqonchilik, balki hunarmandchilik sohasida ham ishlar yo‘lga qo‘yilgan. U kishi kelini Xudoyberdiyeva Saodat Nosirovna bilan birgalikda telpakchilikni rivojlantirib kelmoqda. Qo‘l mehnati bilan tayyorlanadigan telpaklar 300 ming so‘mdan 1,5 million so‘mgacha baholanadi. Shu yo‘l bilan oila yil davomida o‘rtacha 7–8 million so‘m daromad topadi.

Bugun Xudoyberdiyeva oilasi nafaqat o‘z mehnati evaziga mustahkam turmush tarzini yaratibgina qolmay, balki o‘z ibratli faoliyati bilan “Har bir oila – tadbirkor” dasturining amaldagi natijasini yaqqol namoyon etib kelmoqda.

Jo‘yrabod mahallasi ahli bu oilani mirishkorligi, mehnatsevarligi va hunarmandchiligi bilan faxr bilan tilga oladi. Xudoyberdiyeva Shohista Majidovna va uning oilasi — mahallamizning haqiqiy faxridir!

Shofirkon tuman hokimligi axborot xizmati