🏥 Shirin shahrida tibbiyotdagi o‘zgarishlar muhokama qilindi
2025-07-10 12:00:00 / Matbuot anjumanlari
Shirin shahar hokimligida “Tibbiyotda 90 kunlik o‘zgarishlar vaqti” dasturi doirasida amalga oshirilgan ishlar yuzasidan matbuot anjumani o‘tkazildi. Tadbirda shahar hokimining o‘rinbosari Farrux Alimov, tibbiyot birlashmasi rahbariyati, OAV vakillari va jamoatchilik faollari ishtirok etdi.
Anjumanda muassasadagi yoritish tizimi yangilanib, 200 dona LED chiroq o‘rnatilgani, qabulxonalarda qulay muloqot uchun zamonaviy ish joylari yaratilgani ta’kidlandi. Hojatxonalar binoning ichki qismiga ko‘chirilib, gigiyena vositalari bilan to‘liq ta’minlangani, “Ona va bola” xonasi tashkil etilgani va unga kerakli jihozlar o‘rnatilgani haqida ma’lumot berildi.
Nogironligi bo‘lgan fuqarolar uchun panduslar o‘rnatildi, chaqiruv tugmalari o‘rnatish ishlari boshlangan, zambrak, ariston va o‘rindiqlarga ehtiyojlar shakllantirilgan.
Tadbir yakunida jurnalistlar va blogerlarning savollariga mutasaddilar tomonidan atroflicha javoblar berildi. Anjuman aholiga ko‘rsatilayotgan tibbiy xizmatlar sifati va sharoitlarini yaxshilashga qaratilgan amaliy ishlar tahliliga bag‘ishlandi.