Hokim yosh harbiy xizmatchilar bilan uchrashdi
2026-09-04 09:45:00 / Yangiliklar
Mustaqilligimizning 35 yilligi keng nishonlanayotgan shu kunlarda Shirin shahridagi harbiy qismda shahar hokimi Dilfuza Kambarova yosh harbiy xizmatchilar bilan uchrashdi.
Uchrashuv avvalida shahar hokimi harbiy xizmatchilar uchun yaratilgan shart-sharoitlar bilan tanishdi. Askarlar bilan samimiy muloqot qilib, ularning xizmat jarayoni, bilim olishga bo‘lgan qiziqishi, kasb-hunar egallash istagi hamda kelgusidagi rejalari bilan qiziqdi.
Bugun yosh avlod uchun yaratilayotgan keng imkoniyatlar harbiy qismlarda ham o‘zining amaliy ifodasini topmoqda. Xususan, muddatli harbiy xizmat davrida oliy ta’lim muassasalariga o‘qishga qabul qilingan askarlarning ta’limni davom ettirishi uchun harbiy qismga 10 ta zamonaviy kompyuter jamlanmasi topshirildi.
Bu — shunchaki texnika vositasi emas. Ularning har biri askarlar uchun yangi bilimlar sari ochilgan imkoniyat, o‘z ustida ishlash va orzulari tomon tashlangan yana bir qadamdir.
Zero, bugungi Vatan himoyachisi zamon bilan hamnafas bo‘lishi, zamonaviy bilim va ko‘nikmalarni egallashi lozim. Qo‘lida qurol bilan yurt tinchligini asrayotgan yoshlar ertaga o‘z kasbining yetuk mutaxassisi, jamiyatning faol va bilimli a’zolari bo‘lib yetishishlari uchun ham zarur sharoitlar yaratilmoqda.
Ayniqsa, harbiy qismda «Bitta askar — bitta kasb» loyihasi doirasida amalga oshirilayotgan ishlar e’tiborga molik.
Mazkur loyiha asosida har bir muddatli harbiy xizmatchi o‘zining qiziqishi, qobiliyati va iste’dodidan kelib chiqib, muayyan kasb-hunarni egallashi mumkin. Bu esa harbiy xizmat davrini nafaqat Vatan oldidagi burchni ado etish, balki hayot uchun zarur ko‘nikmalarni o‘zlashtirish davriga ham aylantiradi.
Eng muhimi, xizmat muddati yakunlanganidan so‘ng askar qo‘lida kasb-hunar, qalbida Vatanga sadoqat, ongida esa kelajakka ishonch bilan katta hayotga qadam qo‘yadi.
— Muhtaram Prezidentimiz tomonidan muddatli harbiy xizmatchilar uchun keng imkoniyatlar yaratilmoqda. «Bitta askar — bitta kasb» tamoyili asosida har bir askar o‘zi qiziqqan kasbni egallashi mumkin. Bu biz, yoshlar uchun juda katta imkoniyat, — deydi muddatli harbiy xizmatchi Suhrob Jumanazarov. — Bundan tashqari, xizmat davomida oliy ta’lim muassasasiga o‘qishga qabul qilingan askarlarga masofaviy ta’lim olish imkoniyati ham yaratilgan. Eng muhimi, bilim olishimiz va hunar o‘rganishimiz uchun barcha zarur sharoitlar mavjud. Mustaqilligimizning 35 yilligi munosabati bilan harbiy qismimizga 10 ta zamonaviy kompyuter jamlanmasi topshirilganidan juda xursandmiz. Bu bizga bildirilayotgan ishonch va e’tiborning yana bir amaliy ifodasidir. Biz ham ana shu ishonchga munosib bo‘lishga, xalqimiz va Vatanimizga munosib farzand bo‘lib, yurtimiz taraqqiyotiga munosib hissa qo‘shishga harakat qilamiz.
Darhaqiqat, bugun askarga qaratilayotgan e’tibor — ertangi kunga qaratilayotgan e’tibordir. Chunki Vatan himoyasiga bel bog‘lagan yoshning qalbida yurtga sadoqat bilan bir qatorda bilimga chanqoqlik, kasbga qiziqish va kelajakka ishonch ham mustahkamlanishi lozim.
Milliy armiyamiz safida xizmat qilayotgan har bir yosh nafaqat bugungi tinchligimizni asraydi, balki ertangi taraqqiyotimizga ham o‘z hissasini qo‘shadi. Uning bugun egallagan bilimi, o‘rgangan hunari va orttirgan tajribasi kelajakda oilasi, mahallasi va jamiyati ravnaqiga xizmat qiladi.
Shu ma’noda, Shirin shahrida harbiy xizmatchilarga taqdim etilgan zamonaviy kompyuterlar, kasb-hunar o‘rganish uchun yaratilgan imkoniyatlar hamda ta’lim olishga qaratilayotgan e’tibor Mustaqilligimizning 35 yilligi munosabati bilan yoshlarga ko‘rsatilayotgan yuksak ishonch va g‘amxo‘rlikning yorqin ifodasidir.
Bir so‘z bilan aytganda, Vatanga sadoqat faqat qo‘ldagi qurol bilan emas, balki bilim, kasb, mehnat va ezgu maqsadlar bilan ham namoyon bo‘ladi.
G‘ulom Primov, O‘zA muxbiri