Qoraqalpog'iston Respublikasi Chimboy tumani hokimligi

Shımbay rayonı prokurorı R.T.Xalmuratovtıń

rayon xalqına profilaktikalıq - eskertiwshi."

MÚRÁJATÍ

Assalauma áleykum, húrmetli rayon turǵınları!

Húrmetli Prezidentimizdiń baslamaları hám tikkeley basshılıǵında barlıq tarawlarda keń kólemli reformalar ámelge asırılmaqta.

Prezidentimiz mine usı jańalanıw, ózgerislerdiń nátiyjeli bolıwınıń kepili sıpatında mámlekette tınıshlıq hám tatıwlıqtı támiyinlew, onıń ushın jınayachılıqqa qarsı gúresiw sistemasın túp-tiykarınan jaqsılawdı mámleketlik siyasattıń eń tiykarǵı baǵdarlarınan biri dárejesine kóterdi hám ámeliy jumıslarǵa kirisildi.

"Jańa Ózbekstanda huqıqbuzarlıq hám jınayachılıqqa qarsı gúres mine usınday ulıwma milliy áhmiyetke iye wazıypaǵa aylandırıldı.

Áziz puqaralar, Sizlerge huqıqbuzarlıqlar hám jınayatlardıń aldın alıw boyınsha dáslepki, orınlanǵan jumıslar hám tallawlardıń nátiyjeleri boyınsha málimleme bermekshimen.

Rayonımızda tınıshlıq-tatıwlıqtı támiyinlew jınayatlardıń sebeplerin "máhálle kesiminde" hám "tarmaq kesiminde" dodalaw tártibi, máhállelerdi kriminogen dárejede dárejelew sisteması, "máhálle jetiligi" institutı, "sociallıq profilaktika" principi tiykarında huqıqbuzarlıqlar profilaktikasın ámelge asırıw ámeliyatı sheńberinde xalıqta qáwipsizlik sezimin qáliplestiriw baǵdarında bir qatar nátiyjeli ilajlar ámelge asırılmaqta.

Hár bir máhállede huqıqbuzarlıqtıń erte aldın alıw, kriminogen jaǵdaydı turaqlastırıw boyınsha jańa mexanizm engizilip, meniń basshılıǵım astında uyımlararalıq muwapıqlastırıwshı shtab jumısı jolǵa qoyıldı.

Rayondaǵı 22 máhállege juwapker basshılar atpa-at biriktirilip, barlıq máhállelerdiń "jol kartaları" islep shıǵılıp, orınlawǵa qaratıldı.

Máhállelerde "úlgili qáwipsiz kóshe" hám "úlgili qáwipsiz koridor" shólkemlestirilmekte.

Máhállelerge ornatılǵan 200 ge shamalas kameralar járdeminde izlewsdegiler, jınayatlar "ıssı izi" menen ashılmaqta.

Aymaqlarda júz bergen jınayatlardıń ózgesheligin esapqa alǵan halda, 3-sherek ushın "jol kartası" islep shıǵıldı.

Ámelge asırılǵan ilajlar nátiyjesinde "qızıl" kategoriyadaǵı 1 máhálleden kriminogen jaǵday turaqlastırıldı.

Mámleket basshısınıń Qararına tiykar aymaqlardaǵı kriminogen jaǵday hám jınayachılıqtıń aldın alıw boyınsha kúnlik soraw hám úyreniwlerdi jolǵa qoydıq.

Onda, kriminogen jaǵday awır máhállelerdiń jınayat oshaqları ornında úyrenilmekte, máselen, rayon máhállelerinde júz bergen 23 aldın alıw múmkin bolǵan jınayatlardıń sebepleri tallanıp, tiyisli prokuror tásir ilajları qollanıldı.

Nátiyjede rayon aymaǵında namısqa tiyiw, basqınshılıq, tonawshılıq, biyzarılıq, transport quralın alıp qashıw hám adam sawdası jınayatlarınıń júz beriwine jol qoyılmadı.

Keyingi waqıtlarda Ózbekstan huqıq uyımları aldın dus kelmegen kiber jınayatlar salmaǵınıń artıwı ádewir shólkemlestiriwshilik ilajlar kóriwdi talap etpekte.

Maǵlıwmat ushın, rayondaǵı ulıwma jınayatlardıń

25 procentin málimleme texnologiyaları tarawındaǵı jınayatlar quraydı. Sońǵı jılları bul kategoriyadaǵı jınayatlar, bir neshe esege kóbeydi.

Húrmetli rayon xalqı! Júz berip atırǵan jınayatlardıń tallawınan kelip shıǵıp, keleshekte jınayatlar qurbanı bolıp qalmaw ushın:

- aldawshılıq penen shuǵıllanıwshı shaxslardıń internet sociallıq tarmaqları arqalı onlayn tárizde pulıńızdı kóbeytip beriw hámde jer alıp beriw, atıńızǵa kredit rásmiylestirip beriw, arzan bahada úy yaki avtomashina alıp beriwdi wáde etiwshi, sonday-aq, basqa aymaqlardan kelip hár túrli buyımlardı satıp júrgen shaxslardıń aldawına isenbeń;

- úyińizdiń esik hám aynaları bekkemligine itibar beriń, kóshelerde, úyińiz átirapında velosipedlerińizdi, kerekli buyımlarıńızdı qaldırıp ketpeń.

- sharua mallarıńızdı ashıq jaylawlarda hám jol boylarında qarawsız qaldırmań.

- avtomashina esiklerin, aynaların ashıq halda taslap ketpeń, avtomashina ishinde pul hám basqa qımbat bahalı buyımlarıńızdı, sonday-aq, avtomashina giltlerin qaldırıp transport quralın alıp qashıw jınayatınıń kelip shıǵıwına jol qoymań;

Usı jerde, kriminogen jaǵdayǵa tásir etiwshi jınayatlardıń ayırım túrleri haqqında da sóz etpekshimen.

Atap aytqanda, shańaraq hám turmısta júz bergen huqıqbuzarlıqlar da tallanǵanda, huqıqbuzarlıq júz beriwine shańaraq-turmıslıq mashqalalar tiykarǵı sebep bolǵanlıǵı anıqlandı.

Sol sebepli tınımsız, ajırasıw jaǵasındaǵı shańaraqlardıń bar mashqalaların saplastırıw boyınsha basqa da uyımlar hám keń jámietshilikti tarttıq.

Húrmetli rayon xalqı!

Jınayatlarǵa qarsı gúresiwde prokuratura uyımları, járdem hám birge islesiwde jınayatlardıń hár qanday kórinisine shek qoyıwǵa kepillik beredi.

Sebebi, júz berip atırǵan jınayatlardıń ashılıwı hám aldın alıwda xalqımızdan juwapkershilik, umtılıwshılıq hám tiyislilik sezimi menen qatnas jasawdı sorayman.

Jáne bir márte ayrıqsha atap ótemen, jınayattıń hár qanday kórinisine jedellik penen múnásibet bildiriwge, jınayatqa qol urǵanlarǵa jazanıń sózsizligi támiyinleniwine jeke kepillik beremen.

Barlıǵımız jınayattan awlaq jańa Ózbekstan ushın birleseyik!!!

Itibarıńız ushın raxmet.