Sherobodda Mudofaa sohasiga oid yangi ma’muriy bino qurilishi boshlab yuborildi
2025-10-21 17:25:00 / Yangiliklar
🫥Sherobod tumanining “Tarоqli” mahallasi hududida tuman Mudofaa ishlari bo‘limi uchun yangi zamonaviy ma’muriy bino qurilishi bo‘yicha loyiha amalda yo‘lga qo‘yildi. Ushbu bino mudofaa yo‘nalishidagi tashkiliy faoliyat samaradorligini oshirish, fuqarolar bilan ishlashda zamonaviy yondashuvni joriy etish hamda xizmat intizomi va shayligini mustahkamlashga xizmat qilishi ko‘zda tutilgan.
Qurilish joyida Sherobod tuman hokimi U. Alimov hamda Janubiy-g‘arbiy maxsus harbiy okrug qo‘shinlari qo‘mondoni, polkovnik Q. Tursunov ishtirok etdilar. Marosim Qur’on tilovati bilan boshlab berildi va bunyodkorlik jarayonlariga rasmiy tarzda start berildi.
🫥Tadbir davomida loyiha taqdimoti namoyish etilib, unda yangi inshootning bosh reja va me’moriy yechimlari, hudud infratuzilmasi, ichki funksional bo‘limlar hamda xavfsizlik talablari batafsil yoritildi. Shuningdek, obyekt atrofida obodonlashtirish, piyodalar yo‘laklari, avtoturargoh, yashil hududlar hamda bayroq maydonchasini barpo etish rejalashtirilgani ta’kidlandi.
Mazkur inshootning qurilishi natijasida:
* harbiy-ma’muriy boshqaruv samaradorligi oshadi;
* fuqarolar bilan ishlashda ochiqlik va qulaylik yaratiladi;
* xizmatga doir yig‘ilishlar, tayyorgarlik mashg‘ulotlari va muhim tadbirlarni zamonaviy sharoitlarda tashkil etish imkoni tug‘iladi.
Tuman hokimligi mutasaddilariga qurilish ishlarini sifatli, belgilangan muddatlarda va belgilangan standartlarga to‘liq mos holda yakunlash yuzasidan aniq topshiriqlar berildi. Qurilish jarayoni bosqichma-bosqich jamoatchilik nazorati ostida olib borilishi aytib o‘tildi.
🫥Tadbir yakunida bunyodkorlik ramziy tarzda boshlanib, hududda ilk qurilish ishlari joriy etildi.