Surxondaryo viloyati Sherobod tumani hokimligi

🟡 Sherobod tumanida yoshlar o‘rtasida sport musobaqalari ko‘tarinki ruhda o‘tkazildi 🔅
 

Bugungi kunda yoshlarni sportga keng jalb etish, ular orasida sog‘lom turmush tarzini targ‘ib qilish hamda bo‘sh vaqtini mazmunli tashkil etish maqsadida yurtimizning barcha hududlarida turli sport tadbirlari tashkil etilmoqda. Ana shunday sport bayramlaridan biri Sherobod tumanida ham yuqori saviyada tashkil etildi.

🗣 Sherobod tumani hokimligi, huquqni muhofaza qiluvchi hamda mudofaa organlariga biriktirilgan yoshlar o‘rtasida tashkil etilgan sport musobaqalari “Sport arena” majmuasida ko‘tarinki ruh, yuqori kayfiyat va haqiqiy sport muhiti ostida bo‘lib o‘tdi.

🗣 Tadbirda Sherobod tumani hokimi o‘rinbosari A. Pirmatov, tuman prokurori J. Kenjayev, tuman IIB boshlig‘i I. Yusupov hamda tuman FVB bo‘limi boshlig‘i ishtirok etib, yoshlarga sportning inson hayotidagi o‘rni, sog‘lom va barkamol avlodni tarbiyalashdagi ahamiyati haqida samimiy fikr-mulohazalar bildirdilar.

🗣 Musobaqalar futbol, voleybol, shaxmat, armrestling hamda stritbol sport turlari bo‘yicha tashkil etilib, unda tumanning faol, tashabbuskor, sportsevar va iqtidorli yoshlari faol ishtirok etdi. Har bir bellashuv murosasiz va qiziqarli tarzda kechib, yoshlar o‘zlarining jismoniy tayyorgarligi, epchilligi, chidamliligi hamda jamoaviy hamkorlik ko‘nikmalarini namoyon etdilar.

🗣 Ayniqsa, sport bahslari davomida yoshlar o‘rtasida do‘stlik, hamjihatlik, o‘zaro hurmat va sog‘lom raqobat muhiti yanada mustahkamlandi. Tadbir ishtirokchilari sport orqali nafaqat g‘alaba uchun kurashish, balki jamoa bilan ishlash, qat’iyat va intizom kabi muhim hayotiy fazilatlarni ham shakllantirib bordilar.

🗣 Mazkur sport musobaqalaridan ko‘zlangan asosiy maqsad — yoshlar orasida sog‘lom turmush tarzini keng targ‘ib qilish, ularning sportga bo‘lgan qiziqishini oshirish, bo‘sh vaqtini mazmunli tashkil etish hamda jismonan va ma’nan barkamol avlodni voyaga yetkazishdan iboratdir.

🗣 Tadbir yakunida musobaqalarda faol qatnashib, yuqori natijalarni qayd etgan g‘olib va sovrindorlar tantanali ravishda taqdirlandi. Sport bayrami barcha ishtirokchilarga unutilmas taassurot va yuqori kayfiyat ulashdi.