Andijon viloyati Shahrixon tumani hokimligi

Shahrixon tuman prokurori M.A.Boltaboyevning Shahrixon tumani aholisiga murojaati

----------

Hurmatli Shahrixon tumani fuqarolari va tumanimiz mehmonlari!

Muhtaram Prezidentimizning joriy yildagi Qarorlariga asosan mahallalarda xavfsiz muhitni yaratish va huquqbuzarliklarni barvaqt oldini olishga qaratilgan tadbirlar keng qamrovda amalga oshirilmoqda.

Jinoyatchilikni oldini olish maqsadida aholi gavjum bo‘lgan hududlar, maktablar, mahallalarning kirish va chiqish yo‘llariga zamonaviy turdagi videokuzatuv moslamalari o‘rnatildi, bozor, savdo do‘konlari va yashash xonadonlari qo‘riqlovga olindi, ko‘p qavatli uylarning kirish-chiqish eshiklari yanada xavfsiz qilib ta’mirlandi, probatsiya va profilaktika hisobida turuvchi shaxslar, muqaddam jinoyat sodir etgan va jinoyat sodir etishga moyil bo‘lgan shaxslar, alohida toifadagi yoshlar hamda ayollar bilan uchrashuvlar o‘tkazilib, ularning muammolari bosqichma-bosqich bartaraf etib kelinmoqda.

Shu bilan birga, ichki ishlar organlarida probatsiya va profilaktik hisobida turuvchi, shuningdek muqaddam jinoyat sodir etgan va jinoyat sodir etishga moyil bo‘lgan shaxslar, alohida toifadagi yoshlar hamda ayollar bilan uchrashuvlar o‘tkazilib, muammolar bartaraf etib borilmoqda.

Aholi o‘rtasida ommaviy tarzda “tig‘” tadbirlari o‘tkazilayotganligi, tashkilotlar, tadbirkorlar, o‘zini o‘zi boshqarish organlari hamda fuqarolar bilan o‘zlariga tegishli bino va inshootlar, mulklar, ko‘chalar hamda xonadonlarni tuman ichki ishlar bo‘limi qo‘riqloviga topshirishlari, videokuzatuv moslamalari o‘rnatishlari yuzasidan targ‘ibot va tashviqot ishlari olib borilib, jinoyat yuz berishi mumkin bo‘lgan holatlar yuzasidan zudlik bilan mas’ul organ hamda shaxslarga xabar berishlari lozimligi haqida doimiy ravishda huquqiy tushunchalar berib borilayotgan bo‘lsada, ayrim shaxslar tomonidan o‘zining va o‘zganing hayoti, sog‘ligi, mol-mulklariga, qonun bilan qo‘riqlanadigan huquq va manfaatlariga bepisandlik bilan munosabatda bo‘lish holatlari kuzatilmoqda.

Shu munosabat bilan, tumanimiz aholisi va mehmonlaridan sovuq qurol sifatida foydalanish mumkin bo‘lgan ashyolarni jamoat joylarida olib yurmasliklarini, o‘tkir tig‘li jismlardan qonun talablari asosida foydalanishni so‘rab, bunday huquqbuzarlik amaldagi qonunchilikka muvofiq javobgarlikka tortilishga sabab bo‘lishini eslatib o‘taman.

Tumanimizdagi aksariyat huquqbuzarliklar oilaviy kelishmovchiliklar zamirida sodir etilayotganligi kuzatilayotganligi sababli, ushbu holatlarni bartaraf etishda mahallada yuqori hurmat va e’tiborga sazovor bo‘lgan otaxonu-onaxonlarimizdan bunday oilalardagi muhitni sog‘lomlashtirish borasida o‘zlarining maslahat va tavsiyalarini berib borishlarini, shaxsiy namuna ko‘rsatishlarini so‘rab qolamiz.

Yuqoridagi holatlarni barvaqt oldini olishda, albatta, keng jamoatchilik bilan “mahalla yettiligi” mas’ullarining huquqni muhofaza qiluvchi organlar bilan samarali hamkorligini yanada yuqori bosqichlarga olib chiqishimiz kerak.

Bu orqali jamiyatimiz va mahallalarimizni jinoyatdan holi hududga aylantirib, Yurtboshimiz tomonidan berilgan barcha topshiriqlarni sidqidildan, shaxsiy mas’uliyatimizni namoyon etgan holda bajarishimiz zarur.

----------

Shahrixon tuman prokuraturasi