“Kambag‘allikdan farovonlik sari: bamiya va hid anori yetishtirayotgan tadbirkor tajribasi”
2025-07-28 10:15:00 / Yangiliklar
Kambag‘allikni qisqartirish va aholining daromad manbalarini kengaytirish davlat siyosatining ustuvor yo‘nalishlaridan biridir. Shu jihatdan Sayxunobod tumanida “Kambag‘allikdan farovonlik sari” tamoyili asosida amalga oshirilayotgan amaliy ishlar ayni vaqtda o‘z natijasini bermoqda.
Ana shunday tashabbuslarning targ‘ibotini kuchaytirish, aholi o‘rtasida muvaffaqiyatli tadbirkorlik tajribasini ommalashtirish maqsadida Savdo-sanoat palatasi Sayxunobod tumani bo‘limi tomonidan press-tur tashkil etildi.
Mazkur press-tur tumanning “Nurobod” mahallasida yashovchi fuqaro Toshpolatov Abduvoid otaning xonadonida o‘tkazildi. Tadbir doirasida ommaviy axborot vositalari vakillari Toshpolatov Abduvoid otaning dorivor o‘simliklar — Birlashgan Arab Amirliklaridan olib kelingan bamiya va hid anorini yetishtirish orqali yuqori daromadga erishayotgan faoliyati bilan yaqindan tanishdilar.
Toshpolatov Abduvoid otaning o‘zining tomorqasida innovatsion yondashuv asosida dorivor o‘simliklar yetishtirib, nafaqat o‘z oilasining daromadini oshirgan, balki mahalladagi bir nechta fuqaroni ish bilan ham ta’minlagan. Bu tajriba hudud aholisiga yer resurslaridan unumli foydalanish, noan’anaviy ekinlar orqali barqaror daromad manbai yaratish mumkinligini yaqqol namoyon etdi.
— Dorivor o‘simliklar bozori yildan-yilga kengaymoqda. Bamiya BAAda juda qadrlanadi va bizda ham o‘stirish shart-sharoiti mavjud. Eng muhimi — bu ish daromadli, mehnatga yarasha foyda bor, — deydi Toshpolatov Abduvoid ota.