Sirdaryo viloyati Sayxunobod tumani hokimligi

Sayxunobod tumani hokimi Komiljon Mullajanov hamda tuman prokurori Bekmurod Kurbanov tomonidan navbatdagi sayyor qabul o‘tkazildi. Ushbu tadbir aholining dardu muammolarini eshitish, ularni joyida hal etish va fuqarolar bilan bevosita muloqot qilish maqsadida tashkil etildi.

Sayyor qabul davomida aholidan kelib tushgan murojaatlar orasida ish bilan ta’minlash, ijtimoiy yordam, uy-joy masalalari, yer ajratilishi, sog‘liqni saqlash va boshqa turli masalalar bo‘yicha murojaatlar bo‘ldi. Har bir murojaat sinchiklab ko‘rib chiqildi, tegishli mas’ullar ishtirokida muhokama qilinib, qonuniy asosda yechimlar belgilandi.

E’tiborlisi shundaki, ayrim muammolar shu yerning o‘zida hal etildi. Moddiy yordamga muhtoj oilalarga ko‘mak ko‘rsatish, ayrim yoshlarga bandlik masalasida amaliy yo‘llanmalar berish kabi masalalar darhol ijobiy hal qilindi.

“Men har doim bir narsani aytaman — Davlat, xalqning muammosini hal etmasa, rahbarlikning qiymati yo‘q!” — dedi Komiljon Mullajanov. 

Ushbu so‘zlar nafaqat sayyor qabuldagi ishtirokchilarga, balki barcha mas’ullarga hayotiy saboq bo‘lib yangradi. Chunki bugungi rahbar — xalq ichida, uning muammosiga befarq bo‘lmagan, chin dildan xizmat qiladigan inson bo‘lishi kerak.

Sayxunobod tumanida bunday sayyor qabullar muntazam tashkil etilib, aholi muammolariga amaliy yechimlar topilmoqda.