Sayxunobodda ta’lim infratuzilmasini yaxshilash yo‘lida press-tur tashkil etildi
2025-06-14 14:30:00 / Yangiliklar
Sayxunobod tumanida Maktabgacha va maktab ta'limi bo‘limi tomonidan ta’lim sifatini oshirish, bolajonlar uchun qulay va zamonaviy sharoitlar yaratish maqsadida amalga oshirilayotgan qurilish-ta’mirlash ishlari doirasida OAV vakillari ishtirokida press-tur tashkil etildi.
Press-tur davomida jurnalist va blogerlar tuman hududidagi bir nechta ta’lim muassasalariga tashrif buyurib, ayni paytda olib borilayotgan qurilish-ta’mirlash ishlarini ko‘zdan kechirishdi.
Birinchi manzil sifatida 2- va 7-sonli maktabgacha ta’lim tashkilotlariga tashrif uyushtirildi. Bu maskanlarda bolajonlar uchun qulay, xavfsiz va zamonaviy shart-sharoitlarni yaratish maqsadida keng ko‘lamli mukammal ta’mirlash ishlari olib borilayotgani ta’kidlandi. Binolar fasadlaridan tortib, ichki muhitgacha to‘liq yangilanmoqda. Ayniqsa, isitish tizimlari, sanitariya-gigiyena holatlari va o‘quv-mashg‘ulot xonalari zamonaviy standartlarga moslashtirilayotgani diqqatga sazovor bo‘ldi.
Shundan so‘ng, press-tur ishtirokchilari 3-umumta’lim maktabiga yo‘l olishdi. Bu yerda ham qurilish ishlari jadallik bilan olib borilmoqda. Maktab binosi zamonaviy loyiha asosida rekonstruksiya qilinib, o‘quvchilarga yanada kengroq, yorug‘ va qulay sharoitlar yaratilmoqda. Shu bilan birga, sport zallari, ovqatlanish bloklari va kutubxonalar ham to‘liq ta’mirdan chiqarilishi rejalashtirilgan.
Tashkil etilgan press-tur nafaqat ta’lim tizimidagi o‘zgarishlar bilan tanishtirish, balki bu boradagi shaffoflikni ta’minlash, jamoatchilik nazoratini kuchaytirish va ijtimoiy faollikni oshirishga xizmat qildi. OAV vakillari tomonidan berilgan savollarga mutasaddi rahbarlar joyida javob berib, ishlar qamrovi, muddati va sifat darajasi bo‘yicha atroflicha ma’lumotlar taqdim etdilar.
Shuni alohida ta’kidlash joizki, Sayxunobod tumanida ta’lim infratuzilmasini rivojlantirish bo‘yicha olib borilayotgan sa’y-harakatlar zamirida yurt kelajagi bo‘lgan yosh avlodga munosib sharoit yaratish, ularning barkamol inson bo‘lib ulg‘ayishiga zamin hozirlash maqsadi mujassam.