Sayxunobod tumanida gender tenglikni ta’minlash masalalariga bag‘ishlangan tadbir o‘tkazildi
2026-07-13 16:10:00 / Yangiliklar
Sayxunobod tumani Oila va xotin-qizlar bo‘limi tomonidan gender tenglikni ta’minlash, xotin-qizlarning jamiyatdagi o‘rni va faolligini yanada oshirish, ularning huquq va manfaatlarini himoya qilish masalalariga bag‘ishlangan targ‘ibot tadbiri tashkil etildi.
Tadbirda davlat va jamoat tashkilotlari vakillari, mahalla faollari, xotin-qizlar hamda yoshlar ishtirok etdi. Unda mamlakatimizda gender tenglikni ta’minlash borasida amalga oshirilayotgan islohotlar, xotin-qizlar uchun yaratilayotgan imkoniyatlar, ularning ta’lim olishi, tadbirkorlik bilan shug‘ullanishi, mehnat faoliyatida teng huquqlarga ega bo‘lishi yuzasidan olib borilayotgan tizimli ishlar haqida so‘z yuritildi.
Shuningdek, ishtirokchilarga gender tenglik tamoyillariga rioya etish, oilada o‘zaro hurmat va hamjihatlik muhitini mustahkamlash, xotin-qizlarning huquqiy savodxonligini oshirish hamda tazyiq va zo‘ravonlikning oldini olish bo‘yicha amalga oshirilayotgan chora-tadbirlar yuzasidan batafsil ma’lumotlar berildi.
Tadbir yakunida ishtirokchilarni qiziqtirgan savollarga mutaxassislar tomonidan atroflicha javoblar berilib, gender tenglikni ta’minlash borasidagi hamkorlikni yanada kuchaytirish yuzasidan taklif va tavsiyalar bildirildi.
Mazkur tadbir jamiyatda xotin-qizlarning ijtimoiy-siyosiy faolligini oshirish, ularning huquq va manfaatlarini ishonchli himoya qilish hamda gender tenglik madaniyatini yanada yuksaltirishga xizmat qiladi.