Sirdaryo viloyati Sayxunobod tumani hokimligi

Sayxunobod tumanida O‘zbekiston Respublikasi Prezidentining 2025-yil 17-yanvardagi PQ–12-sonli qarori ijrosi doirasida aholining bandligini ta’minlash va kambag‘allikni qisqartirish borasida amalga oshirilayotgan ishlar yuzasidan matbuot anjumani tashkil etildi.

Anjumanda ta’kidlanganidek, joriy yilda tumanda 927 ta kambag‘al oila va ularning 5 004 nafar a’zolarini kambag‘allikdan chiqarish reja qilingan. Bugungi kunga qadar kambag‘allik reyestriga kiritilgan 1 850 ta oila, ya’ni 7 978 nafar fuqaro bilan manzilli ishlar olib borildi. Natijada kambag‘allik darajasi 11,8 foizni tashkil etmoqda.

Xorijiy va ichki manbalar hisobidan ko‘rsatilgan amaliy yordamlar natijasida joriy yilning yanvar–noyabr oylarida 1 013 ta oila yoki 4 351 nafar fuqaro kambag‘allik reyestridan chiqarildi. Bu belgilangan yillik rejaga nisbatan 109,3 foiz ijro etilganini ko‘rsatadi. Shu orqali tumanda kambag‘allik darajasi 4,3 foizga tushirildi.

Matbuot anjumanida xizmatlar ko‘rsatish yo‘li bilan aholini qo‘llab-quvvatlash ishlari ham alohida qayd etildi. Jumladan, 105 nafar fuqaro doimiy ish bilan ta’minlandi, 418 nafarga imtiyozli kredit va subsidiyalar ajratildi, 62 nafar fuqaro kasb-hunarga yo‘naltirildi, 685 nafar fuqaro tadbirkorlikka jalb qilindi. Ushbu chora-tadbirlar natijasida 1 013 ta oila daromadi oshgani sababli kambag‘allik reyestridan chiqarildi.

Shuningdek, Prezidentning 2024-yil 23-sentabrdagi PQ–330-sonli qaroriga muvofiq “Kambag‘allikdan farovonlik sari” dasturi doirasida tumanda 295 ta kambag‘al oila tashkilot rahbarlariga biriktirildi. Bugungi kunga qadar ushbu oilalardan 310 tasi ko‘rsatilgan amaliy yordamlar evaziga kambag‘allik reyestridan chiqarilgani qayd etildi.

Anjumanda mutasaddilar tomonidan kambag‘allikni qisqartirish borasidagi ishlar izchil davom ettirilishi, manzilli yordam va bandlikni ta’minlash ustuvor yo‘nalish bo‘lib qolishi ta’kidlandi.