Sayxunobod tumani hokimining qishloq va suv xo‘jaligi masalalari bo‘yicha o‘rinbosarining murojaati
2025-10-20 10:25:00 / Yangiliklar
Hurmatli tuman aholisi, qishloq xo‘jaligi sohasi vakillari va aziz hamkasblar!
Bugungi kunda mamlakatimizda korrupsiyaga qarshi kurashish davlat siyosatining ustuvor yo‘nalishlaridan biri sifatida belgilangan. Davlatimiz rahbari tomonidan barcha sohalarda, jumladan qishloq va suv xo‘jaligi tizimida ham halollik, ochiqlik va shaffoflik tamoyillarini mustahkamlash bo‘yicha izchil islohotlar amalga oshirilmoqda.
Shu nuqtai nazardan, biz — Sayxunobod tumanining qishloq xo‘jaligi sohasi xodimlari — har bir qarorimizda, har bir amaliy ishimizda adolat va qonun ustuvorligini ta’minlashimiz, korrupsiyaning har qanday ko‘rinishiga qarshi murosasiz bo‘lishimiz zarur.
Qishloq xo‘jaligi tizimida korrupsion holatlar — fermer xo‘jaliklariga yer ajratish, suv ta’minoti, texnika va yoqilg‘i-moylash mahsulotlari taqsimoti, subsidiyalar va boshqa resurslardan foydalanishda — eng katta xavf sifatida namoyon bo‘ladi. Shu bois, ushbu jarayonlarning barchasi faqat ochiq, qonuniy va jamoatchilik ishtirokida amalga oshirilishi shart.
Men barcha soha xodimlarini o‘z faoliyatida halollik, mas’uliyat va vijdonlilik tamoyillariga qat’iy amal qilishga, aholini esa har qanday shubhali yoki noqonuniy holatlar haqida tuman hokimligi yoki tegishli tashkilotlarga murojaat qilishga chaqiraman.
Biz birgalikda harakat qilsakgina, qishloq xo‘jaligini korrupsiyadan holi, samarali va adolatli tizimga aylantira olamiz.
Keling, barchamiz sohada “Halollik – eng oliy qadriyat” tamoyilini hayot mezoniga aylantiraylik!
Hurmat bilan,
_________
Sayxunobod tumani hokimining
qishloq va suv xo‘jaligi masalalari bo‘yicha o‘rinbosari — Xurshid Qilichev