Samarqand viloyati Samarqand shahar hokimligi

Bugungi kunda fuqarolar murojaatlari bilan ishlash masalasi davlat siyosati darajasiga ko‘tarilgani, ayniqsa, Prezident Shavkat Mirziyoyev raisligida o‘tkazilayotgan videoselektor yig‘ilishlarida bu yo‘nalishga alohida e’tibor qaratilayotgani barcha rahbarlar zimmasiga katta mas’uliyat yuklaydi.

Ana shu talab va vazifalardan kelib chiqqan holda, bugun Samarqand shahar hokimi Fazliddin Umarov boshchiligida tegishli mas’ullar hamda shahardagi bo‘lim va boshqarmalar rahbarlari ishtirokida fuqarolar murojaatlari bilan ishlash masalalariga bag‘ishlangan tanqidiy muhokama yig‘ilishi bo‘lib o‘tdi.

— Shuni unutmangki, har bir murojaat ortida odamlarning taqdiri, ularning dardi va kutib yurgan umidi bor. Insonlarning ishonchiga munosib bo‘lish esa bizning vazifamiz va har bitta murojaatga mas’uliyat bilan qarash burchimizdir, — dedi shahar rahbari. 

Muhokamalar davomida fuqarolar murojaatlarini o‘z vaqtida ko‘rib chiqish, ijrosini ta’minlash hamda nazorat qilish, ijro va mehnat intizomiga qat’iy rioya etish, shuningdek, davlat xizmatchilarining odob-axloq qoidalariga qat’iy rioya etishi masalalari atroflicha ko‘rib chiqildi.

Qayd etilganidek, murojaatlarning sifatli va o‘z vaqtida hal etilishi jamiyatda davlat organlariga bo‘lgan ishonchni mustahkamlashda muhim omil hisoblanadi. Shu munosabat bilan mas’ul xodimlarning shaxsiy javobgarligini oshirish, murojaatlar bilan ishlashda shaffoflikni ta’minlash hamda ortiqcha byurokratik to‘siqlarni bartaraf etish bo‘yicha aniq ko‘rsatmalar berildi.

Shu bilan birga, har bir murojaatni chuqur tahlil qilish, ularga qonuniy asosda va aniq muddatlarda javob qaytarish hamda tizimli muammolarni aniqlab, ularni bartaraf etish yuzasidan amaliy chora-tadbirlar belgilab olindi.