“Gender tenglik faoli” milliy tanlovining Rishton tumani bosqichi bo‘lib o‘tdi
2026-10-02 13:20:00 / Yangiliklar
An’anaviy tarzda o‘tkazib kelinayotgan “Gender tenglik faoli” milliy tanlovining Rishton tumani bosqichi doirasida tuman komissiyasining yig‘ilishi bo‘lib o‘tdi.
Unda tanlovda ishtirok etish uchun tuman hududidagi davlat organlari va tashkilotlari, nodavlat notijorat tashkilotlari, tadbirkorlik subyektlari hamda boshqa muassasalar tomonidan taqdim etilgan hujjatlar atroflicha ko‘rib chiqildi.
Yig‘ilish davomida ishtirokchilarning gender tenglikni ta’minlash, xotin-qizlarning huquq va qonuniy manfaatlarini himoya qilish, ularning jamiyatdagi faolligini oshirish, bandligini ta’minlash, tadbirkorligini qo‘llab-quvvatlash borasidagi ishlari o‘rganildi.
Shuningdek, tashkilot va muassasalarda gender tenglik tamoyillarini hayotga tatbiq etish, xotin-qizlar uchun munosib sharoit yaratish hamda ularning tashabbuslarini qo‘llab-quvvatlashga alohida e’tibor qaratilgani qayd etildi.
Yig‘ilish yakunida tanlov ishtirokchilarining taqdim etgan hujjatlari va amalga oshirgan ishlari belgilangan mezonlar asosida baholanib, tegishli qarorlar qabul qilindi.