Bu galgi tashrif odatdagidan biroz boshqacha bo‘ldi. Negaki, uchrashuv markazida nafaqat ta’lim sifati va kitobxonlik masalalari, balki maktabning eng fidoyi insonlari — farroshlar mehnati ham turdi.
Samimiy muloqot davomida tuman hokimi farroshlarni oddiy ishchi emas, balki maktab ozodaligi, fayzi va obodonchiligining chinakam fidoyilari ekanini alohida ta’kidladi.
— Maktabning fayzi, tartibi va chiroyi sizlarning mehnatingiz bilan yaratiladi. Sizlarni juda hurmat qilamiz, — deya e’tirof etildi uchrashuv davomida.
Oddiy, ammo samimiy e’tibor va iliq so‘zlar maktab xodimlari qalbida unutilmas taassurot qoldirdi.
📚 Tashrif davomida yana bir ezgu tashabbus — kitobxonlikni rivojlantirish borasidagi ishlar bilan ham tanishildi.
Ma’lumki, yaqinda 29-maktab jamoasi tomonidan maktab hududida ko‘chma kitob do‘koni tashkil etish tashabbusi ilgari surilgandi. Bugun esa ushbu g‘oya amaliyotga tatbiq etilib, ko‘chma kitob do‘koni o‘z faoliyatini boshladi.
Mazkur maskanda bo‘lgan tuman hokimi va tuman prokurori maktab kutubxonasi uchun kitoblar sovg‘a qilib, yoshlarning bilim va tafakkurini boyitishga qaratilgan bunday tashabbuslarni yuqori baholadilar.
Tuman hokimi maktab jamoasiga qisqa muddatda berilgan va’daning amalda bajarilgani uchun minnatdorlik bildirib, kelgusida ham ma’rifat va kitobxonlik yo‘lidagi ishlar davom etishini ta’kidladi.
📖 Kitob — tafakkur kaliti.
🌿 Inson qadri esa — e’tibor va hurmatda namoyon bo‘ladi.
Bugungi uchrashuv aynan ana shu ikki yuksak qadriyatni o‘zida mujassam etdi.