Rishtonda “Davlat xavfsizlik xizmati raisi kubogi” musobaqalariga start berildi
2026-04-04 12:40:00 / Yangiliklar
Mazkur sport tadbiri tumandagi 68 ta mahalladan 16–30 yoshli yigit-qizlarni birlashtirdi. Ishtirokchi jamoalar 4 ta sektorga bo‘lingan holda o‘zaro bahs olib borib, g‘oliblik uchun kurashmoqda.
Musobaqaning ochilish va qur’a tashlash marosimi ko‘tarinki ruhda o‘tdi. Unda tuman hokimi Bahodirjon Xoliqov, tuman prokurori Rashidbek Mehmonov, tuman ichki ishlar bo‘limi boshlig‘i Shavkatjon Mavlonov, “Nuroniy” jamg‘armasi tuman kengashi raisi Tursunxo‘ja Abdurahmonov hamda Davlat xavfsizlik xizmati vakillari ishtirok etib, jamoalarga omad tiladilar.
Ta’kidlanganidek, mazkur musobaqa Prezidentimizning yoshlar siyosatiga doir qarorlari asosida tashkil etilib, yoshlarni sportga keng jalb qilish, ularning jismoniy faolligini oshirish hamda sog‘lom avlodni tarbiyalashga xizmat qiladi.
Shuningdek, bu kabi musobaqalar yoshlar o‘rtasida do‘stlik, hamjihatlik va sog‘lom raqobat muhitini shakllantirishda muhim omil bo‘lib xizmat qilmoqda.
Musobaqa yakunida eng kuchli jamoalar “Davlat xavfsizlik xizmati raisi kubogi”, diplomlar hamda esdalik sovg‘alari bilan taqdirlanadi.
Darhaqiqat, sport — bu nafaqat jismoniy chiniqish, balki yoshlar tarbiyasi va jamiyat salomatligining muhim garovidir.