Янги мактаб – Янги имкониятлар, билимлар кунига ўқувчилар учун улкан совға.
2025-09-02 13:00:00 / Yangiliklar
Юртимизда таълим соҳасини ривожлантириш, ёш авлод учун замонавий ва муносиб шарт-шароитлар яратиш давлат сиёсатининг устувор йўналишларидан бирига айланган. Бугун таълимга қаратилган эътибор, амалга оширилаётган ислоҳотлар замирида келажагимиз эгалари бўлган ёшлар тақдири, уларнинг билимли, салоҳиятли ва етук шахс бўлиб камол топишига йўл очиб бермоқда.
Шу маънода, Қува туманидаги 5-сонли умумтаълим мактаби учун 990 ўқувчига мўлжалланган янги замонавий бинонинг барпо этилиши барчада катта қувонч уйғотди. Мазкур таълим маскани Ўзбекистон Республикаси Божхона қўмитаси ташаббуси билан, 31,2 миллиард сўм ҳомийлик маблағлари ҳисобига қурилиб, ёшлар ихтиёрига топширилди.
Билимлар куни муносабати билан ташкил этилган тантанали маросимда янги мактаб биноси ўқувчилар учун фойдаланишга топширилди. Унда Ўзбекистон Республикаси Божхона қўмитаси масъул ходимлари, вилоят ҳокими ўринбосари Ш.Полвонов, Мактабгача ва мактаб таълими бошқармаси бошлиғи Ш.Долимов, туман ҳокими Х.Умаров, нуронийлар, жамоатчилик вакиллари ҳамда ота-оналар иштирок этдилар.
Янги мактаб барча қулайлик ва имкониятларга эга. Замонавий синф хоналари, ахборот-коммуникация технологиялари билан жиҳозланган компьютер зали, спорт зали, кутубхона ва маънавий-маърифий масканлар ўқувчилар учун билим олиш жараёнини янада самарали ва қизиқарли этиб беради.
Ушбу билим маскани ёшлар қалбида илмга муҳаббат уйғотиш, уларнинг иқтидори ва салоҳиятини тўла намоён этиши учун мустаҳкам пойдевор бўлиб хизмат қилади. Чунки замонавий таълим муҳитида тарбия топган ҳар бир ўқувчи эртанги куннинг етук мутахассиси, Ватан тақдирига масъул шахс сифатида вояга етади.
Шубҳасиз, Қува туманида барпо этилган ушбу янги билим даргоҳи ёшлар келажагига нурли йўл, бутун туманимиз таълим тизимида эса муҳим воқеа сифатида тарихда қолади.