Farg'ona viloyati Qo'shtepa tumani hokimligi

Aholini gaz ballonlari bilan ta’minlash endi Yagona portal orqali amalga oshiriladi O‘zbekistonda jismoniy shaxslarni maishiy gaz ballonlari bilan ta’minlash xizmati 2026-yil 1-iyundan boshlab faqat Davlat xizmatlari markazlari yoki Yagona interaktiv davlat xizmatlari portali (https://my.gov.uz/uz) orqali ko‘rsatiladi. Bu haqda hukumatning 17-apreldagi qarorida belgilandi. (https://lex.uz/uz/docs/-8145061) Hujjatda qayd etilishicha, suyultirilgan gazni iste’molchilarga maishiy gaz ballonlarida yetkazib berish xizmatlarini takomillashtirish, aholiga qulayliklar yaratish, masofadan turib elektron xizmatlardan mustaqil foydalanish imkoniyatlarini kengaytirish maqsad qilingan. Maishiy gaz balloni tabiiy gaz bilan gazlashtirilmagan hududlarda yashovchi jismoniy shaxslarga beriladi. Vakolatli operator ariza kelib tushgan kuni ma’lumotlarni “E-gaz” dasturida shakllantiradi. 1 ish kunida so‘rovnomada ko‘rsatilgan ma’lumotlarni tekshiradi. 3 ish kunida ariza beruvchini maishiy gaz balloni bilan ta’minlash masalasi joyiga chiqib o‘rganiladi. Bunda o‘rganish yakunlari bo‘yicha dalolatnoma rasmiylashtiriladi. Dalolatnomada keltirilgan xulosa ijobiy bo‘lgan taqdirda, ariza beruvchi bilan “Maishiy gaz ballonini vaqtincha foydalanishga berish to‘g‘risida” va “Suyultirilgan uglevodorod gazini yetkazib berish to‘g‘risida”gi shartnomalar 2 nusxada rasmiylashtiriladi. Shartnomalar asosida ariza beruvchi Face ID tizimi orqali suyultirilgan uglevodorod gazini yetkazib berish uchun tegishli hisobvaraq bilan ta’minlanadi hamda unga 1 dona maishiy gaz balloni 12 ish kunida bepul yetkazib beriladi. “Hududgazta’minot” AJ Raqamli texnologiyalar vazirligi va Adliya vazirligi bilan birgalikda bir oy muddatda “E-gaz” dasturi Davlat xizmatlari markazlari va YAIDXP bilan integratsiya qilinishini ta’minlaydi. “Hududgaztaʼminot” AJ 2026-yil boshlarida e’lon qilgan ma’lumotlarga ko‘ra, bugungi kunda 4,5 milliondan ortiq isteʼmolchi tabiiy gaz, shuningdek, 3,7 milliondan ziyod iste’molchilarga suyultirilgan gaz yetkazib berilmoqda. 2025-yil davomida suyultirilgan gaz isteʼmolchilariga jami 637,3 ming tonnadan ortiq suyultirilgan uglevodorod gazi yetkazib berilgan.