Buxoro viloyati Qorako'l tumani hokimligi

Taqdimot davomida yangi ish o‘rinlarini yaratish, tadbirkorlik tashabbuslarini qo‘llab-quvvatlash, yangi mikroloyihalarni ishga tushirish hamda har bir ehtiyojmand xonadon bilan individual ishlash masalalariga alohida e’tibor qaratildi.

Shundan so‘ng tuman rahbari mahalladagi ijtimoiy ko‘makka muhtoj oilalar xonadonlariga borib, ularning yashash sharoiti bilan yaqindan tanishdi, muammolari, taklif va murojaatlarini tingladi.

Jumladan, davlat ta’minotidagi oilalar toifasiga kiruvchi Karomat Hamroyev xonadonida bo‘lib, oilaning sharoiti o‘rganildi. Oilada ikki nafar farzand bo‘lib, katta o‘g‘li Guliston davlat universitetida tahsil olmoqda. Suhbat davomida oila bekasi sog‘lig‘i bilan bog‘liq muammolar mavjudligini bildirdi.

Mazkur masala tuman hokimi tomonidan joyida nazoratga olinib, tuman sog‘liqni saqlash bo‘limi boshlig‘iga tegishli topshiriq berildi. Natijada fuqaroning bepul tibbiy ko‘rikdan o‘tkazilishi, zarur tibbiy amaliyot va muolajalar bilan ta’minlanishi belgilandi.

Shuningdek, davlat ta’minotidagi oilalar toifasiga kiruvchi Hakim Sodiqov xonadonida ham bo‘lib, oilaning ijtimoiy va maishiy sharoiti o‘rganildi. Er-xotinning har ikkisida ham nogironlik mavjudligi inobatga olinib, ularni tibbiy ko‘rik va zarur davolash muolajalari bilan ta’minlash hamda xonadonini ta’mirlash bo‘yicha mas’ullarga tegishli topshiriqlar berildi.

Tuman rahbari mas’ullarga ehtiyojmand oilalarni qo‘llab-quvvatlash, ularning ijtimoiy muammolarini bartaraf etish bilan birga, mehnatga layoqatli oila a’zolarining bandligini ta’minlash va daromad manbalarini yaratishga qaratilgan ishlarni izchil davom ettirish yuzasidan aniq vazifalar berdi.