Xitoy kompaniyasi bilan istiqbolli hamkorlik aloqalari muhokama qilindi
2026-01-14 14:15:00 / Yangiliklar
Uchrashuv davomida tomonlar o‘rtasida sanoat, mashinasozlik va ishlab chiqarish sohalarida hamkorlik aloqalarini yo‘lga qo‘yish, mavjud imkoniyatlardan samarali foydalanish masalalari atroflicha muhokama qilindi. Xususan, tuman hududida zamonaviy texnologiyalar asosida ishlab chiqarish quvvatlarini tashkil etish, yangi ish o‘rinlari yaratish hamda ilg‘or xorijiy tajribani joriy etish masalalariga alohida e’tibor qaratildi.
O’z navbatida, Himile Mechanical Manufacturing (Shandong) Co., Ltd. Xitoy Xalq Respublikasining Shandong provinsiyasi Gaomi iqtisodiy rivojlanish hududida joylashgan yirik sanoat korxonasidir. Kompaniya yuqori aniqlikdagi mexanik qismlar, injeneriya va kimyo sanoati uskunalari, markazdan qochma va to‘lqinli kompressorlar, shuningdek kompressor bloklari va boshqa mexanik komponentlar ishlab chiqarishga ixtisoslashgan.
Tuman hokimi Xurshid Toxirov tumanning qulay investitsiyaviy muhiti, sanoat zonalari, logistika imkoniyatlari hamda tadbirkorlar uchun yaratilgan imtiyozlar haqida batafsil ma’lumot berdi. Shuningdek, xorijiy investorlar bilan o‘zaro manfaatli va uzoq muddatli hamkorlikni rivojlantirish ustuvor vazifalaridan biri ekanini ta’kidladi. O‘z navbatida, Himile Mechanical Manufacturing kompaniyasi vakillari ham hamkorlik qilishdan manfaatdor ekanliklarini bildirdi.
Uchrashuv yakunida tomonlar kelgusida aniq loyihalar bo‘yicha muzokaralarni davom ettirish, o‘zaro tashriflarni yo‘lga qo‘yish va hamkorlikni amaliy bosqichga olib chiqish bo‘yicha kelishib oldilar.