Tuman hokimi Xurshid Toxirovning "Qishloq xo'jaligi xodimlari kuni" munosabati bilan bayram tabrigi
2025-12-13 20:45:00 / Rahbariyatning bayonotlari va nutqlari
Ushbu qutlug‘ ayyomda qadoq qo‘li va fidoyi qalbi bilan elimizning rizq-nasibasini yaratayotgan mohir dehqon va fermerlar, bog‘bonlar, chorvador va pillakorlar, suvchilarga samimiy minnatdorlik bildiraman.
Yangi O‘zbekiston ravnaqi va aholi farovonligi yo‘lida fidokorona mehnat qilayotgan agronom va mexanizatorlar, agroklasterlarning rahbarlari va ishchi-xodimlari, dehqon xo‘jaligi rahbarlari, sohaning jonkuyar olimlariga cheksiz tashakkurlar izhor etaman.
Qadrli xo‘jaligi sohasi xodimlari!
Yaxshi bilasizki, Hurmatli Prezidentimiz Siz azizlar bilan bo‘ladigan uchrashuvlarda Sizni qalbimga, yuragimga eng yaqin va aziz insonlar, deb bilaman deya sizdek zahmatkash kasb egalariga o‘zlarining samimiy hurmat va ehtiromlarini bildirib keladilar.
Biz ham xalqimiz bilan birgalikda ushbu xursandchilik kunlarida siz azizlarni bayram bilan muborakbod etar ekanmiz, bu yilgi mashaqqatli mehnatingiz, erishilgan natijalar va oldimizda turgan rejalar haqida fikr yuritishimiz tabiiy, albatta.
Tumanda joriy yilda 5705 quti pilladan qariyb 348 tonna hosil olinib, belgilangan reja 102 foizga uddalandi.
Jumladan, Ziyoda Adizova, Gulrabo Hasanova, Marusa Husenova, Dilrabo Kamolova, Hilola Qurbonova, Zuhra Sherqulova, kabi tumandoshlarimiz dastlabki hosilimiz sanalgan pilladan mo‘l hosil yetishtirdilar.
Tumanda 225 ta fermer xo‘jaliklari tomonidan 6034 gektar maydonga g‘alla ekilib, qariyb 50 ming tonna g‘alla hosili yetishtirildi. O‘rtacha har bir gektar yerdan 82 sentner hosil olindi. Ishlab chiqarilgan g‘allaning 17 ming tonnadan ortig‘i davlatga sotilgan bo‘lsa, qolgan 33 ming tonnasi fermer xo‘jaliklarimiz ixtiyorida qoldirildi.
G‘allachilik sohasida ayniqsa “Oydinoy Olim Oybek”, “Paxtakor Fidokor”, “Asliddin Obod zamini”, “Barhayot Parmonobod”, “Yashin”, “To‘yxon momo”, “Askar Hamro Xakimboy”, “Ozod Shaxob”, “O‘rin Shoxibek Jahon”, “Qorako‘l Islomjon Raxmon” hamda “Davron bobo saxovati” kabi fermer xo‘jaliklarining erishgan yutuqlarini alohida aytib o‘tishni joiz deb bilaman. Kelgusi yilda ushbu sohadagi natijalarimizni ham yanada yaxshilab, o‘rtacha hosildorlikni 100 sentnerga yetkazishni ko‘zlagan holda dalalarimizga baraka urug‘ini qadadik.
Joriy yil tumanda paxtachilik yo‘nalishida 239 ta fermer xo‘jaliklari tomonidan 8 ming 100 gektar maydonda serhosil navlarga mansub chigit ekilib, agrotexnik talablar asosida g‘o‘za parvarishlandi.
Tumanda belgilangan 36 ming tonna o‘rniga 39 ming tonnaga yaqin hosil yig‘ishtirib olinib, yillik shartnoma rejasi ortig‘i bajarildi. Mavsum davomida terimchilar yordamida 28 500 tonnaga yaqin hosil yig‘ishtirib olingan bo‘lsa, qolgani paxta mashinalari yordamida terilgani ham o‘ziga xos tajriba bo‘ldi.
Ayniqsa bu yil tarmoqda yuqori hosildor xorij navlari va duragaylarini olib kelib ekilgani evaziga tumanimizda paxta hosili har yilgidan ko‘ra mo‘lroq bo‘lganini alohida e’tirof etmoqchiman.
Ayniqsa, “Samad Beshim”, “Olim Vali Fayz”, “Sharofiddin Obod paxtakor”, “Muxammadali Xasanov”, “Ozodbek Ravshanov”, “Farangiz”, “Boboqul Onda”, “Dilmurod-74”, “Durmuxammad Bekmurod Kulol”, “Bobodehqon”, “Mullo Kilich bobo”, “Hotamboy ota Nuroniy” hamda “Barxayot Yuldosh paxtakor” kabi fermer xo‘jaliklari paxtadan 60-65 sentnergacha hosil olib, hammaga namuna bo‘lganini minnatdorlik bilan ta’kidlayman.
Avvallari Qorako‘lda 60-65 sentner paxta olish mumkin desa hech kim ishonmagan bo‘lardi. Sababi, ekin yerlari kuchli sho‘rlangan suv ta’minoti og‘ir bo‘lgan ushbu hududning eng tajribali dehqonlari ham ko‘pi bilan 30 sentnerdan nariga o‘tmagan. Avvallari Qorako‘lda 60-65 sentner paxta olish mumkin desa hech kim ishonmagan bo‘lardi. Sababi, ekin yerlari kuchli sho‘rlangan suv ta’minoti og‘ir bo‘lgan ushbu hududning eng tajribali dehqonlari ham ko‘pi bilan 30 sentnerdan nariga o‘tmagan. Ushbu natijadarimizdan ilhomlangan holda kelgusi yilgi paxtachilik bo‘yicha o‘rtacha hosildorligimizni 55 sentnerga yetkazib, 42 ming tonnalik ulkan oq oltin xirmoni yaratishni ezgu maqsad qilib oldik.
Bulardan tashqari joriy yil tumanimizda meva-sabzavot, go‘sht, sut, tuxum, baliq, asal, qorako‘l teri va jun yetishtirish bo‘yicha belgilangan reja-topshiriqlarning ham ortig‘i bilan ado etilgani bu yil davomida Siz azizlarning tunu kun qilgan mashaqqatli mehnatingiz samarasidir.
Erishilgan ushbu yutuqlarimiz natijasida bu yilgi mavsumda tumanimiz har jihatdan oldi qatorlardan joy egalladi. Eng muhimi dehqonlarimizning moddiy manfaatdorligi har qachongidan oshdi, ishga munosabat o‘zgardi desam aslo yanglishmagan bo‘laman.
Aziz do‘stlar!
Ta’kidlash lozimki, tumanimizniing ijtimoiy-iqtisodiy rivojida paxta-to‘qimachilik klasterlarining roli juda katta bo‘lmoqda. Sababi agroklasterlar qishloq xo‘jaligini modernizatsiya qilish, sohani sanoatlashtirish, mahsulotlarni chuqur qayta ishlash, pirovardida chetga xom ashyo emas, qo‘shimcha qiymatga ega tayyor mahsulot eksport qilish, bandlikni ta’minlash, kambag‘allikni qisqartirish kabi asosiy vazifalarni samarali amalga oshirmoqda.
Bir so‘z bilan aytganda klaster tizimi orqali bugun dalalarimizga zamonaviy texnika, xorijiy tajriba kirmoqda, ilm bilan amaliyot uyg‘unlikda olib borilmoqda.
Bugun tumanimiz paxta-to‘qimachilik klasterlari xorij tajribasi asosida qishloq xo‘jaligini rivojlantirish, ayniqsa, Xitoyning paxtachilikdagi ilg‘or tajribalarini ommalashtirish borasida barchaga o‘rnak bo‘lmoqda desam ayni haqiqatni aytgan bo‘laman.
E’tiborlisi, tumanimizda faoliyat ko‘rsatib kelayotgan paxta-to‘qimachilik klasterlarining fidokorona mehnati Hurmatli Prezidentimiz tomonlaridan ham munosib e’tirof etilib, kelinmoqda.
Ushbu bayram arafasida Hurmatli Prezidentimizning tegishli Farmoni bilan “Qorako‘l kumush kalava” paxta-to‘qimachilik klaster rahbari Mansurov Asror Mexriddinovich “Shuhrat” medali bilan taqdirlangangani bu yilga bayramimizga eng munosib sovg‘a bo‘ldi desam ayni haqiqatni aytgan bo‘laman.
Hurmatli, fermerlar!
Suv taqchilligi yildan yilga sezilayotgan keyingi paytda ekin yerlarini sug‘orishda foydalaniladigan kanal va ariqlarni tartibga keltirish, o‘zanini betonlashtirish dolzarb ahamiyat kasb etmoqda. Shundan kelib chiqib joriy yilda tumanimiz dalalarini suv bilan ta’minlovchi 100 kilometr kanal va ariqlarni betonlashtirish ishlari jadal olib borildi. Bu yo‘nalishdagi ishlarimizni kelgusi 2026 yilda ham Siz bilan birgalikda izchil davom ettiramiz.
Hurmatli fermerlar, qadrli tumandoshlar!
Bugun yurtimizda qishloq xo‘jaligi sohasiga davlat siyosati darajasida katta e’tibor qaratilmoqda. Kecha Prezidentimiz Shavkat Mirziyoyev tomonidan soha xodimlari kuni munosabati bilan o‘tkazilgan uchrashuvda ham qishloq xo‘jaligi samaradorligini oshirishga qaratilgan bir qator muhim vazifalar belgilab berildi.
Jumladan, Davlat rahbarining topshirig‘iga muvofiq Ochiq drenaj va kollektorlarni yopiq tizimga o‘tkazish bo‘yicha alohida respublika Dasturi qabul qilindi.
Ushbu maqsadlar uchun 100 million dollar mablag‘ yo‘naltiriladi. Dastur doirasida zamonaviy texnologiyalar, maxsus texnika va yangi moliyalashtirish mexanizmlari joriy etiladi.
Ushbu Dastur doirasida Prezidentimiz tomonidan bizga ham kelasi yilning o‘zida kamida ming kilometr drenaj liniyasini yopiq tizimga o‘tkazish evaziga 1,5 ming gektar qo‘shimcha ekin maydonlari yaratish, shuningdek ushbu ishlarga tajribali tadbirkorlar, fermer xo‘jaliklari va mahalliy mutaxassislarni keng jalb etish vazifalari yuklatildi.
Qadrli fermerlar, aziz tumandoshlar!
Bu jarayonda sizlarning faol ishtirokingiz juda muhim: yerimizni asrash va undan oqilona foydalanish, drenaj ishlarida fuqarolik nazoratini kuchaytirish, yangi tizimning afzalliklarini tushunish va qo‘llab-quvvatlash, aholi, fermerlar va mutasaddi tashkilotlar o‘rtasidagi hamkorlikni mustahkamlashimiz lozim.
Ushbu Dastur amalga oshirilgandan keyin: tumanimizda qo‘shimcha qishloq xo‘jaligi yerlari paydo bo‘ladi; hosildorlik oshadi, fermerlar daromadi ko‘payadi; suv resurslari tejaladi; ekologik sharoit yaxshilanadi; qishloq xo‘jaligida barqaror rivojlanishga erishiladi.
Yurtimizda qishloq xo‘jaligini rivojlantirish, yerdan samarali foydalanish va fermerlar imkoniyatlarini kengaytirish bo‘yicha amalga oshirilayotgan bu ishlar – barchamizning kelajagimiz, oziq-ovqat xavfsizligimiz va farovon hayotimiz uchun xizmat qilishiga ishonaman.
Fursatdan foydalanib, Hurmatli fermerlarimiz hamda barcha aholi vakillarini mazkur yangi dasturni qo‘llab-quvvatlashga, faol ishtirokchi bo‘lishga chaqirib qolaman.
Qadrli tumandoshlar!
Biz yil boshidanoq hosilimiz har yilgidan ham mo‘l bo‘sin deya yaxshi niyatlar qilgan edik. Ko‘rib turganingizdek buning natijasi bo‘ldi. Mana bugun Siz azizlar bilan birgalikda Yangi yilning ostonasida turib ham kirib kelayotgan yangi – 2026 yilda hosilimiz yanada mo‘l bo‘lsin deya ezgu niyatlar qilamiz.
So‘zim yakunida barchangizni ushbu fayzli va shukuhli ayyom bilan yana bir bor tabriklayman.
Siz azizlarga sihat-salomatlik, oilaviy baxt-saodat, xonadonlaringizga tinchlik va farovonlik tilayman.
Xalqimiz, elimiz dasturxonidan to‘kin-sochinlik hech qachon arimasin!
Bayramingiz muborak bo‘lsin, aziz mirishkorlar!