Haqorat va tahdid javobsiz qolmaydi: Qonun ustuvorligi va fuqarolar huquqlari himoyasida
2026-10-19 10:00:00 / Rahbariyatning bayonotlari va nutqlari
Haqorat va tahdid javobsiz qolmaydi: Qonun ustuvorligi va fuqarolar huquqlari himoyasida
Jamiyatda yurish-turish qoidalarini mensimaslik, o‘zgalarning sha’ni va qadr-qimmatini kamsitish, shuningdek, fuqarolarning osoyishtaligini buzish qonunchiligimizga ko‘ra qat’iy javobgarlikka sabab bo‘ladi. Biroq, oramizda hali-hanuz qonun talablarini unutib, ayol kishiga nisbatan ruhiy va jismoniy tazyiq o‘tkazish orqali o‘z «hukmini» o‘tkazmoqchi bo‘ladigan shaxslar uchrab turgani afsusli holat.
Sud amaliyoti shuni ko‘rsatadiki, har qanday huquqbuzarlikka nisbatan jazoning muqarrarligi to‘liq ta’minlanmoqda.
Voqea aslida qanday bo‘lgan edi?
Ish hujjatlariga ko‘ra, 1995-yilda tug‘ilgan, bank filiali mutaxassisi bo‘lib ishlovchi fuqaro A.X. (ism-sharifi o‘zgartirilgan) fuqaro R.Sh.ga nisbatan muntazam ravishda tazyiq o‘tkazib kelgan.
Muntazam haqoratli xabarlar: Fuqaro A.X. 2026-yilning 14-aprel kunidan boshlab jabrlanuvchi R.Sh.ga turli xil qo‘pol va sha’nini toptovchi SMS-xabarlar yuborib, uni muntazam ravishda haqoratlab kelgan.
Jamoat joyida zo‘ravonlik va mayda bezorilik: Bu bilan cheklanmay, 2026-yil 9-avgust kuni soat 22:00 larda Termiz shahrida joylashgan, jabrlanuvchi ishlaydigan «Paynet» shoxobchasiga borgan. U yerda jamoat tartibini va fuqarolar tinchligini buzib, ayolning xohishiga qarshi o‘ziga tegishli avtomashinaga qo‘lidan sudrab, majburlab o‘tqazib olib ketgan.
Jabrlanuvchi R.Sh. sud majlisida A.X. unga muntazam ravishda ruhiy va jismoniy tazyiq o‘tkazib kelganini, shu sababli Ichki ishlar organlariga murojaat qilishga majbur bo‘lganini bildirib, unga nisbatan qonuniy va og‘irroq jazo qo‘llashni so‘radi.
Sayyor sud va ochiq muhokama
Ushbu ma’muriy ish jinoyat ishlari bo‘yicha Qiziriq tuman sudi tomonidan «Rabotak» mahalla fuqarolar yig‘ini binosida sayyor sud majlisida ko‘rib chiqildi.
Sud majlisida huquqbuzar A.X. aybiga to‘liq iqrorlik bildirib, qilmishidan chin ko‘ngildan pushaymonligini aytgan bo‘lsa-da, uning aybi guvohlar ko‘rsatuvlari, SMS-yozshmalar, videotasvir qaydlari va to‘plangan boshqa hujjatlar bilan to‘liq o‘z isbotini topdi.
Sud hukmi va tayinlangan jazo
Sud huquqbuzarlikning ijtimoiy xavflilik darajasini, ayol kishiga nisbatan qilingan tazyiqni va jamiyatda yurish-turish qoidalari qo‘pol ravishda buzilganini e’tiborga olib, A.X.ga nisbatan Ma’muriy javobgarlik to‘g‘risidagi kodeksning 34-moddasi qo‘llagan holda uzil-kesil og‘irroq jazo tayinlashni lozim topdi:
Sud huquqbuzarga 15 (o‘n besh) sutka ma’muriy qamoq jazosi tayinladi.
Xulosa o‘rnida
Inson sha’ni, qadr-qimmati va shaxsiy daxlsizligi Konstitutsiyamiz hamda qonunlarimiz himoyasidadir. Ayolga nisbatan har qanday shakldagi tazyiq, haqorat yoki zo‘ravonlik «shaxsiy munosabat» sifatida niqoblana olmaydi va bunga huquqiy baho beriladi. Ushbu sud qarori jamiyatda tartib-intizomni saqlash va kelgusida shu kabi huquqbuzarliklarning oldini olishda muhim saboq bo‘lishi shart.
Jinoyat ishlari bo‘yicha Qiziriq tuman sudining tergov sudyasi A.B.Xakimov