Toshkent viloyati Qibray tumani hokimligi

Qibray tumanida yosh tadbirkorlarni har tomonlama qo‘llab-quvvatlash, ularning muvaffaqiyatli faoliyatini tadbirkorlik bilan shug‘ullanish istagidagi yoshlarga o‘rnak sifatida targ‘ib etish hamda yangi loyihalarni qo‘llab-quvvatlash maqsadida Yoshlar kuni munosabati bilan ochiq muloqot tashkil etildi.

Toshkent davlat agrar universitetida bo‘lib o‘tgan uchrashuvda Qibray tumani hokimi Muzaffar Rashidov, O’zMilliybank AJ vakili U.Valiyev, ToshDAU rektori N.Oblamurodov hamda tuman prokurori S.Arshidinov ishtirok etdi.

Ochiq muloqot davomida yosh tadbirkorlarning amalga oshirayotgan loyihalari, biznesni rivojlantirish uchun yaratilayotgan imkoniyatlar, kredit va subsidiya masalalari hamda yoshlar bandligini ta’minlashga qaratilgan tashabbuslar muhokama qilindi. Shuningdek, faoliyatini endi boshlayotgan yoshlarga tajribali tadbirkorlar faoliyati misolida zarur tavsiya va ko‘rsatmalar berildi.

Ochiq va samimiy ruhda o‘tgan uchrashuv davomida yoshlarning tadbirkorlik faoliyatini yo‘lga qo‘yish, biznesni kengaytirish, imtiyozli kreditlar, bandlik hamda o‘z loyihalarini amalga oshirish bilan bog‘liq ko‘plab savol va murojaatlari tinglandi. Har bir murojaat yuzasidan mutasaddilar tomonidan atroflicha tushuntirishlar berilib, amaliy yechim talab etadigan masalalar nazoratga olindi.

Tadbir yakunida yoshlarning tashabbus va g‘oyalari qo‘llab-quvvatlanishi, ularning biznes loyihalarini ro‘yobga chiqarish bo‘yicha amaliy yordam ko‘rsatish ishlari izchil davom ettirilishi ta’kidlandi.