Toshkent viloyati Qibray tumani hokimligi

Qibray tumani hokimi Muzaffar Rashidov rahbarligida o‘tkazilgan tanqidiy yig‘ilishda tumanda amalga oshirilayotgan ishlar, yo‘l qo‘yilayotgan kamchiliklar hamda mas’ullar faoliyatidagi sustkashliklar keskin muhokama qilindi.
 

Yig‘ilishda ko‘chalar tozaligi va obodonlashtirish ishlari ayrim hududlarda talab darajasida tashkil etilmayotgani, ekologik muammolar o‘z vaqtida bartaraf etilmayotgani hamda kuzatuv kameralari bilan qamrov masalasida sustkashlikka yo‘l qo‘yilayotgani qattiq tanqid ostiga olindi.

Shuningdek, noqonuniy qurilmalarni bartaraf etish borasidagi ishlar qoniqarsiz ekani, ayrim mas’ullar tomonidan bu boradagi vazifalarga loqayd munosabatda bo‘linayotgani ta’kidlandi. Kommunal xizmatlar bo‘yicha qarzdorliklarni undirish ishlari ham yetarli darajada olib borilmayotgani qayd etilib, mutasaddilar faoliyatiga keskin baho berildi.

Davlat dasturlari doirasida ijtimoiy soha obyektlarida olib borilayotgan qurilish va ta’mirlash ishlari ham tanqidiy tahlil qilindi. Ayrim obyektlarda ishlarning sifatsiz tashkil etilgani, belgilangan muddatlarga rioya qilinmayotgani hamda nazoratning sustligi oqibatida kamchiliklarga yo‘l qo‘yilgani ko‘rsatib o‘tildi.

Aholi murojaatlari bilan ishlash masalasida ham qator kamchiliklar mavjudligi qayd etildi. Fuqarolarni qiynayotgan muammolarga befarq qarash, murojaatlar ijrosini cho‘zish va masalalarni joyida hal etmaslik holatlariga mutlaqo yo‘l qo‘yilmasligi ta’kidlandi.

Yig‘ilish yakunida har bir rahbar va mas’ul xodim faoliyati yuzasidan aniq vazifalar belgilab berildi. Kamchiliklarni bartaraf etish, ijro intizomini kuchaytirish hamda tuman rivojiga to‘sqinlik qilayotgan muammolarni qisqa muddatlarda hal etish bo‘yicha qat’iy topshiriqlar berildi.

“Tuman hokimi so‘z yakunida belgilangan vazifalar ijrosi bo‘yicha nazorat yanada kuchaytirilishi, topshiriqlarni o‘z vaqtida bajarmagan mas’ullarga nisbatan tegishli choralar ko‘rilishini qat’iy ta’kidlab o‘tdi.”