Tumanda 8-mart — Xalqaro xotin-qizlar kuni munosabati bilan bayram tadbiri o‘tkazildi Qibray tumani hokimligi tashabbusi bilan “Do‘rmon bog‘i” tadbirlar koshonasida 8-mart — Xalqaro xotin-qizlar kuni munosabati bilan bayram tadbiri tashkil etildi. Unda
2026-03-08 09:00:00 / Yangiliklar
Aziz va muhtarama onaxonlarimiz, ayollarimiz, opa-singillarimiz!
Barchangizni yurtimizga bahor nafasi bilan kirib kelgan nafosat va go'zallik bayrami, 8- mart - Xalqaro xotin-qizlar kuni bilan samimiy muborakbod etaman!
Ayollar hayot abadiyati timsoli, jamiyatning gultoji, oilaning baxti, xonadonlarimizning fayzi va farishtasidir. Hurmatli Prezidentimiz rahnamoligida olib borilayotgan davlat siyosatida xotin-qizlarimizga, ularning benazir aqlu zakovatiga, yuksak salohiyatiga katta ishonch bilan tayanilayotganida ham chuqur ma’no bor.
Sizning avvalo, oiladagi, navqiron avlod tarbiyasidagi, mahalladagi fidoyiligingiz, jamiyatda topgan obro‘-e’tiboringiz, hikmatga boy umr yo‘lingiz va pandu nasihatlaringiz tumanimiz xotin-qizlari uchun o‘rnak va ibrat namunasi bo‘lib kelayotganini yaxshi bilamiz va yuksak qadrlaymiz.
Zotan, biz hamisha farzandlarimiz tarbiyasi, oilalar barqarorligini ta’minlashda ko‘pni ko‘rgan kayvonilarimiz, duogo‘y onaxonlarimizning katta hayotiy tajribasiga suyanamiz.
Qadrli opa-singillar!
Tumanimizning Siz kabi oqila va fidoyi ayollari jamiyatimizda olib borilayotgan o‘zgarish va yangilanishlar jarayonida, boshqaruv tizimida, tadbirkorlik, ilm-fan, sog‘liqni saqlash, madaniyat va san’at sohalarida, mahallalarda qanchalik fidokorona mehnat qilib kelayotganini hammamiz yaxshi bilamiz va yuksak qadrlaymiz.
Sizga Inson qadri, yurtimiz ravnaqi va taraqqiyoti yo‘lida olib borayotgan beqiyos xizmatlaringiz uchun tumanimiz ahli va faollari nomidan minnatdorlik bildirishni o‘zimning sharafli burchim, deb bilaman.
Ilmga chanqoq, dono singillarim!
Sizlarning dunyoni lol qoldirayotgan aql-zakovatingiz, ilmga chanqoq va tirishqoqligingizga tasannolar aytsak arziydi.
Biz hamisha orzu-maqsadlarimiz, umidlarimiz ro‘yobini muhabbat, vafo va sadoqat, fidoyilik va matonat timsollari bo‘lgan opa-singillarimiz, oqila qizlarimizning baxtu iqboli bilan bog‘laymiz.
Zotan, Sizlarning avvalambor sog‘-salomat bo‘lib, kelajakka katta ishonch bilan boqib, ilmu-ma’rifat olib, har sohada havas marralarini egallab, hayotda qoqilmay, baxtli yashashingizni ta’minlash barcha sa’y-harakatlarimizning asosiy maqsadi va mezoni, desak yanglishmaymiz.
Sizni go‘zallik bayrami munosabati bilan o‘qish va ishlaringizda, ezgu orzu-umidlaringiz, maqsad va muddaolaringiz ro‘yobida ulkan zafarlar tilayman!
Aziz ayollar!
Sizni bugungi fayzli ayyom bilan qutlar ekanman, Sizga mustahkam salomatlik, saodatli umr, oila quvonchi, farzandu nabiralar baxtu iqbolini tilayman. Hamisha davlatimiz e’zozi, jamiyatimiz ardog‘ida yuring!
Barchangizni bahor va nafosat, go‘zallik bayrami bilan yana bir bor samimiy tabriklayman. Iqbolingiz baland, umringiz uzoq, rizqu nasibangiz ziyoda bo‘lsin!
Xalqimiz, Vatanimiz, ertamiz davomchilari baxtu iqboli uchun doimo omon bo‘ling!
Bayramingiz muborak bo‘lsin!
Qibray tumani hokimi
Muzaffar Rashidov