Toshkent viloyati Qibray tumani hokimligi

Jinoyatchilik va huquqbuzarliklarning oldini olish, hududlarda xavfsiz muhitni ta’minlash maqsadida Qibray tumani hokimi Muzaffar Rashidov boshchiligida tuman mutasaddilari ishtirokida Parvoz mahalla aholisi bilan uchrashuv tashkil etildi.

Uchrashuv davomida o‘tgan yilda mahallada, ayniqsa, yoshlar o‘rtasida sodir etilgan jinoyatlar, oilaviy ajrimlar hamda notinch oilalar holati atroflicha tahlil qilindi. Jinoyatchilikning kelib chiqishiga sabab bo‘layotgan omillar muhokama qilinib, profilaktik ishlar samaradorligini oshirish, oilaviy munosabatlarni mustahkamlash, yoshlar o‘rtasida huquqbuzarliklarning barvaqt oldini olish bo‘yicha tegishli idoralarga manzilli chora-tadbirlarni amalga oshirish yuzasidan aniq topshiriqlar berildi.

Shuningdek, mahallada ijtimoiy muhitni barqarorlashtirish, ishsiz fuqarolarni bandlikka jalb etish, muammoli oilalar bilan manzilli ishlash, huquqiy targ‘ibot ishlarini kuchaytirish orqali jinoyatchilik darajasini pasaytirish masalalariga alohida e’tibor qaratildi.

Uchrashuv yakunida fuqarolar murojaatlari tinglanib, mavjud muammolarni tizimli ravishda bartaraf etish hamda mahallada osoyishtalikni ta’minlash yuzasidan mutasaddi tashkilot va rahbarlarga tegishli vazifalar belgilab berildi.