“Hokimlik soati”da aholi va qishloq xo‘jaligini ro‘yxatga olish ishlariga alohida e’tibor qaratildi
2026-01-26 11:05:00 / Yangiliklar
Qibray tumani hokimi Muzaffar Rashidov rahbarligida o‘tkazilgan navbatdagi “Hokimlik soati” yig‘ilishida aholi va qishloq xo‘jaligini ro‘yxatga olish ishlarining joriy holati va ularni sifatli tashkil etish masalalari asosiy kun tartibidan o‘rin oldi.
Yig‘ilishda aholi va qishloq xo‘jaligini ro‘yxatga olish ishlari davlat boshqaruvi tizimini takomillashtirish, hududlarda ochiqlik va shaffoflik tamoyillariga asoslanib, belgilangan ustuvor islohotlar ijrosini ta’minlash, shuningdek, aholi va qishloq xo‘jaligi salohiyatini aniq hisobga olgan holda ijtimoiy-iqtisodiy rivojlanishni strategik rejalashtirishda hal qiluvchi ahamiyat kasb etishi alohida ta’kidlandi. Shu bilan birga, ro‘yxatga olish ishlariga mas’ul idora va tashkilotlar faoliyatida mavjud ayrim kamchiliklar tanqidiy ruhda ko‘rib chiqildi.
Tuman hokimi tomonidan ro‘yxatga olish jarayonlariga jalb etilgan xodimlarning mas’uliyatini oshirish, aholi o‘rtasida tushuntirish ishlarini kuchaytirish bo‘yicha aniq topshiriqlar berildi.
Yig‘ilish davomida ijro intizomini mustahkamlash, yoshlar bilan ishlash tizimini takomillashtirish hamda davriy nashrlarga obuna masalalari ham ko‘rib chiqildi.
Shuningdek belgilangan vazifalar ijrosini qat’iy nazoratga olish hamda mazkur yo‘nalishda tizimli va izchil ish olib borish yuzasidan mas’ul rahbarlarga tegishli ko‘rsatmalar berildi.
Yig‘ilish yakunida tashkiliy masala ko‘rildi. Qibray tumani hokimining raqamli texnologiyalar va sun’iy intellekt texnologiyalarni rivojlantirish bo‘yicha maslahatchisi lavozimiga Nuraliyev Zuxriddin tayinlandi.