Qashqadaryo viloyati Qamashi tumani hokimligi

G‘allangizga qo‘shimcha o‘git bering hamda agrotexnik tadbirlarni o‘z vaqtida qo‘llab, g‘alladan mo‘l hosil olishga erishing!

Qishloq xo‘jaligi xodimlari kuni munosabati bilan agrar sohada mehnat qilayotgan dehqon va fermerlarning iqtisodiyotimizni yuksaltirish, xalqimiz farovonligini oshirish, oziq-ovqat xavfsizligini ta’minlash borasidagi ulkan xizmatlari e’tirof etildi. Bu, albatta, fermer va dehqonlarimizni yuksak marralar va yuqori natijalar sari ruhlantiradi, o‘z vazifasiga katta mas’uliyat bilan yondoshishga undaydi.

Davlatimiz rahbari tomonidan qabul qilingan ko‘plab Farmon va qarorlar Siz, dehqon va fermerlarning qishloq xo‘jaligi mahsulotlarini yetishtirishdagi ulkan yutuqlaringizga mustahkam zamin yaratmoqda.

Aynan, O‘zbekiston Respublikasi Prezidentining 2025-yil 9-dekabrdagi “Paxtachilik va g‘allachilikda hosildorlikni oshirish uchun yuqori samarador intensiv agrotexnologiyalarni qo‘llashning qo‘shimcha chora-tadbirlari to‘g‘risida”gi PQ-370-sonli qarori bilan fermerlarga katta imtiyoz va vakolatlar berildi. Jumladan, zamonaviy intensiv agrotexnologiyalarni keng joriy etish, ilm-fan yutuqlari va ustoz-shogird an’analariga asoslangan yangi tizimni joriy etish orqali hosildorlikni oshirish, hosildorlikni g‘allachilikda 100 sentnergacha yetkazish borasida davlat tomonidan qo‘llab-quvvatlash choralari belgilandi.

G‘alla yetishtiruvchi fermer xo‘jaliklarini moliyaviy qo‘llab-quvvatlash maqsadida 2026-yil hosilidan boshlab g‘allani o‘z mablag‘lari yoki tijorat kreditlari hisobidan yetishtirib, uni belgilangan tartibda birja savdolari yoki davlat resursi uchun realizatsiya qilgan qishloq xo‘jaligi korxonalariga mahsulot qiymatining 10 foizi miqdorida subsidiya beriladi.

Bu imtiyozli kreditni olmasdan g‘alla yetishtiruvchi fermer xo‘jaliklari uchun katta imkoniyat, degani.

Shuningdek, suv tejovchi texnologiyalarni joriy qilish borasida katta imtiyozlar berilgani ham fermerlarimizni suvdan tejamkorlik bilan foydalanishga va g‘alladan yuqori hosil olishga rag‘batlantiradi.

Yangi O‘zbekistonimizning bu yilgi ulkan g‘alla xirmonini omilkor dehqonlar, fermerlar, suvchilar, agronom va mexanizatorlar hamda sohaning fidoyi olimlari, tajribali mutaxassislarning zahmatli mehnatlari evaziga yaratilishini hammamiz his qilib turibmiz.

Mamlakatimizda fermer xo‘jaliklariga g‘alla yetishtirish uchun ajratilgan imtiyozli kredit mablag‘laridan erkin foydalanish hamda xizmat ko‘rsatuvchi va resurs yetkazib beruvchilarni ixtiyoriy tanlash huquqining berilishi, shuningdek, donni xarid qilish hamda sotishda birja mexanizmining joriy etilganligi Siz fermerlarga katta manfaatdorlikni ta’minlamoqda.

Dehqonlar ta’biri bilan aytganda, “Yil yilga o‘xshamaydi”, bugungi kunda g‘alla maydonlarini parvarishlashda o‘zga agrotexnik tadbirlarni amalga oshirishni davr shiddati taqozo etmoqda.

Hududlarda sohaning olim va mutaxassislari tomonidan shu kunlarda 18 dan ortiq fermerlar va klasterlarning 393 gektar g‘alla maydonlarida ekinlar rivoji pastligi, ya’ni tuplagan, lekin 3-4 barg, 1-2 barg fazasida rivojlanayotganligi aniqlangan.

Jumladan, tumanlardagi 10-15 foiz fermerlarning g‘alla maydonlarini qo‘shimcha oziqlantirish va agrotexnik tadbirlarni o‘z vaqtida qo‘llab, 2026-yil g‘alla hosilidan yuqori daromad olishni ta’minlash bugungi kunning eng dolzarb masalasi bo‘lib turibdi.

Qamashi tuman fermerlar kengashi tomonidan g‘allani oziqlantirish va rivojini ta’minlash borasida zarur agrotexnik tadbirlarni amalga oshirishda sust ish olib borayotgan ikki ming uch yuzga yaqin fermer xo‘jaliklari faoliyati muhokama qilinib, yo‘l qo‘ygan qoloqlikni qisqa muddatlarda bartaraf etilishi yuzasidan ogoh etilib, amaliy tavsiyalar berildi.

Aziz mirishkor dehqon va fermerlar!

Yuqoridagi kamchiliklarni o‘z vaqtida bartaraf etish uchun O‘zbekiston fermerlari kengashi rayosati a’zolari, tegishli soha olim va mutaxassislari tomonidan g‘alla yetishtiruvchi fermer xo‘jaliklariga va klasterlarga 2026-yilda har bir gektar g‘alladan 100 sentnergacha hosil olish uchun quyidagi ishlarni amalga oshirishni maqsadga muvofiq, deb hisoblaymiz:

1. Har bir fermer xo‘jaligi tomonidan g‘alla maydonlarini yana bir bor ko‘rib, rivojidan orqada qolayotgan maydonlarni aniqlab oling.

2. Qisqa muddatda barcha maydonlarga yetarli azotli o‘g‘itlar zahirasini yarating va kechki hamda qoloq g‘alla maydonlarini yaxshilash maqsadida gektariga qo‘shimcha 100-150 kg azotli o‘g‘itlar bilan oziqlantirishni tashkil etib, g‘alladan barakali hosil olishga erishing.

3. Sug‘orilmagan g‘alla maydonlarida o‘q ariqlar oralig‘ini 60-70 metrdan olish va qisqa muddatda yengil sug‘orishni tashkil eting.

4. Ekilgan g‘alla maydonlarida kunduzi va kechki paytlarda ham dalalarda chorva mollarini boqish holatlari ko‘paymoqda, shuning uchun maysani payhondan himoyalash maqsadida dala chetlarini chetan bilan o‘rashni tashkil eting.

5. Yanvar oyida mavsum davomida talab etiladigan mineral o‘g‘itlar, biostimulyatorlar va kimyoviy vositalar zahirasini shakllantirish, texnikalarni ta’mirlash ishlarini amalga oshirib, ob-havo sharoitidan kelib chiqib, suspensiya sepishni tashkil eting.

6. G‘alla maydonida yomg‘iratib sug‘orishni yo‘lga qo‘yib, davlat tomonidan beriladigan subsidiya mablag‘ini oling hamda hosildorlikni har gektariga 10-12 sentnerga oshiring va suvni 35-45 foizga tejang.

7. Dalangizning suv kirish qulog‘iga handak o‘ra qazib, gektariga 3 tonnadan mahalliy o‘g‘it jamg‘arishni tashkil eting.

8. Kechki va unib chiqmagan g‘alla maydonlariga quruq, chirigan mahalliy o‘g‘it sepishni tashkil eting, bunda, gektariga 5 tonnadan mahalliy o‘g‘it qo‘llanilganda kuzgi bug‘doy hosildorligi 6-10 sentnerga oshishi va mahalliy, mineral o‘g‘itlar bilan birgalikda qo‘llanilganda samaradorlik yanada yuqori bo‘lishini aslo unutmang