Qashqadaryo viloyati Qamashi tumani hokimligi

Bugun “Eng namunali tuman va shahar” hamda “Eng namunali vazirlik va idora” tanlovlarining yakuniy bosqichi va taqdirlash marosimi bo'lib o'tdi.

O‘zbekistonda ma’naviy-ma’rifiy ishlarni takomillashtirish va ijtimoiy-ma’naviy muhitni mustahkamlash maqsadida Prezidentning 2021 yil 26 martdagi PQ–5040-son qaroriga muvofiq har yili Respublika Ma’naviyat va ma’rifat markazi tomonidan tashkil etib kelinayotgan Eng namunali vazirlik va idora” hamda “Eng namunali tuman va shahar” tanlovlari 2025 yilda yangi tartib, ya’ni yangilangan Nizom va Respublika komissiyasi tarkibi asosida tanlovlar yanada ochiq, shaffof va xolis baholash mezonlari bilan o‘tkazilmoqda.

Tanlovning maqsadi – mamlakatimizda ma’naviy-ma’rifiy sohadagi ilg‘or amaliyotlarni ommalashtirish, hudud va vazirliklar o‘rtasida sog‘lom raqobatni kuchaytirish, aholi, ayniqsa yoshlar orasida ma’naviy muhitni mustahkamlash.

I. “Eng namunali tuman va shahar” tanlovi

Birinchilardan bo‘lib bu yil hududiy bosqich joriy etildi. Qoraqalpog‘iston Respublikasi hamda viloyatlarda o‘tkazilgan baholash natijalariga ko‘ra 14 ta tuman va shahar Respublika bosqichida ishtirok etish uchun tavsiya etildi:

Navoiy va Marg‘ilon shahri, Chimboy, Baliqchi, Vobkent, Zarbdor, Qamashi, Uychi, Narpay, Guliston, Sherobod, Yuqori Chirchiq, Gurlan, Chilonzor tumanlari.

Baholashda ma’naviy-ma’rifiy ishlarning samaradorligi, moddiy-texnik baza holati, axoli va yoshlar qamrovi, kitob targ‘iboti, ma’naviyat maskanlari faoliyati kabilarga alohida e’tibor qaratildi.

II. “Eng namunali vazirlik va idora” tanlovi

Joriy yil 30 ta vazirlik va idora tanlovda ishtirok etish istagini bildirdi. Ular orasida quyidagilar bor:

-vazirliklar (Adliya, Investitsiyalar, Ichki ishlar, Mudofaa, Ekologiya, Ta’lim, Iqtisodiyot va moliya va boshqalar)

- qo‘mita va agentliklar-bank va yirik korxonalar (Markaziy bank, “O‘zsanoatqurilishbank”, “Navoiazot”, NKMK va boshqalar)

Respublika komissiyasi taqdim etilgan hujjatlar va joylarda o‘rganishlar asosida faoliyatni baholab bordi.

        Mukofotlar va nominatsiyalar

Baholash natijasiga ko‘ra

Eng namunali vazirlik va idora tanlovida: 

1-o’rin Bosh prokuratura

2-o’rin Bojxona qo’mitasi

3-o’rin Navoiy kon metallurgiya kombinati

Eng namunali tuman va shahar tanlovida:

1-o’rin Qashqadaryo viloyati Qamashi tumani;

2-o’rin Toshkent shahar Chilonzor tumani

3-o’rin Buxoro viloyati Vobkent tumani va Andijon viloyati Baliqchi tumani loyiq topildi va pul mukofotlari bilan taqdirlandi.

Alohida nominatsiyalar bo'yicha g‘oliblar:

 - “Davlat tilida ish yuritish bo‘yicha eng namunali vazirlik-idora” nominatsiyasi bo‘yicha Adliya vazirligi

 - “Eng faol targ‘ibotchi vazirlik-idora” nominatsiyasi bo‘yicha

Biznesni rivojlantirish banki

- “Eng faol kitobxon vazirlik-idora” nominatsiyasi bo‘yicha Favqulodda vaziyatlar vazirligi

 - “OAV va ijtimoiy tarmoqlarda eng faol vazirlik-idora” nominatsiyasi bo‘yicha Mudofaa vazirligi

 “Eng yaxshi vazirlik-idora sayti” nominatsiyasi bo‘yicha Milliy gvardiya

Har bir nominatsiya g‘olibi diplom va kitoblar to‘plami bilan taqdirlandi.

Bu yil tanlovda quyidagi o‘ziga xos jihatlar inobatga olindi:

•  Mahallalarda “Ma’naviyatchilar guruhi” faoliyati yo‘lga qo‘yilgani;
•  Yangi O‘zbekiston fidoiylari – hoji ota va hoji onalar targ‘ibot ishlariga jalb etilgani;
•  Korxona va tashkilotlarda kitobxonlik keng targ‘ib qilinishi;
•  Radiouzellar tashkil etilishi va ularda milliy mumtoz musiqalar targ‘ib qilinishi;
•  Ma’naviy-tarbiyaviy yo‘nalishdagi maqsadli tadbirlar soni.