Namangan viloyati Pop tumani hokimligi

Viloyat rahbariga hududdagi turizm salohiyatini oshirish bo‘yicha yangi loyihalar taqdimoti o‘tkazildi. Mavjud infratuzilma muammolari muhokama qilinib, ularni bartaraf etish bo‘yicha aniq vazifalar belgilandi. Bundan ko‘zlangan maqsad — mahalliy va xorijiy sayyohlar uchun qulay hamda zamonaviy turizm muhitini yaratishdir.

Imom ota mahallasi va atrof hududlarda innovatsion yondashuv asosida 12 ta kapsula uy qurilishi ko‘zda tutilgan. Bu dastlabki qadam bo‘lib, bir yo‘la 44 nafar sayyohni qabul qilish imkoniyatini yaratadi.
2026 va 2027 yillarda bu loyiha yanada kengayib, jami 77 ta kapsula uyga aylanadi. Ushbu hudud endi nafaqat ziyoratgoh, balki dam olish, ijod, tinchlik va maftunkor tabiatdan bahra olish uchun mo‘ljallangan turizm markazi sari qadam tashlayapti.

Viloyat hokimi oilaviy dam olish maskanlarida bo‘lib, sayyohlar uchun yaratilgan sharoitlar bilan tanishdi. Suhbatlar davomida mavjud imkoniyatlar va muammolar ko‘rib chiqilib, turizm salohiyatini yanada oshirishga qaratilgan takliflar o‘rganildi.

Ma’lumot uchun, o‘tgan mavsumda tumanda 300 ta oilaviy mehmon uyi, 4 ta dam olish maskani, 3 ta bolalar oromgohi, 2 ta xostel, 1 ta kemping va 30 ta gastronomik turizm obyekti faoliyat boshlab, 1500 dan ortiq ish o‘rni yaratilgan. 650 mingga yaqin sayyoh tumanga tashrif buyurgan.
Endilikda ushbu hududda sayyohlarga yanada qulaylik yaratish maqsadida yo‘l infratuzilmasini yaxshilash bo‘yicha amaliy chora-tadbirlar belgilandi.