Toshkent viloyati Piskent tumani hokimligi

Piskent tumanida pillachilik sohasini rivojlantirishga qaratilgan amaliy seminar bo‘lib o‘tdi.

Mazkur tadbirda Zulayho Bahriddinovna Mahkamova — O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi, shuningdek viloyat hokimining qishloq xo‘jaligi masalalari bo‘yicha birinchi o‘rinbosari, tuman hokimi hamda Toshkent viloyatining 22 ta shahar va tuman hokimlarining xotin-qizlar masalalari bo‘yicha o‘rinbosarlari ishtirok etdi.

Seminar davomida pillachilik sohasida Xitoy tajribasini joriy etish, qurt urug‘ini saqlash va tarqatishning zamonaviy usullari, shuningdek aholi bilan ishlashning samarali mexanizmlari yuzasidan batafsil ma’lumotlar berildi. Tadbirda viloyatdagi pillachilik yo‘nalishida mas’ul barcha tashkilot va mutaxassislar, xitoylik mutaxassislar ishtirok etib, ilg‘or tajribalar amaliy tarzda tushuntirildi.

Seminardan so‘ng Zulayho Mahkamova tuman hokimi hamrohligida Piskent tumanining Mingtepa mahallasida bo‘lib, hududdagi xonadonlarda yaratilgan sharoitlar, aholining yashash va turmush tarzi bilan yaqindan tanishdi. Mahalla yettiligi a’zolari tomonidan hududda amalga oshirilayotgan ishlar, xotin-qizlarni qo‘llab-quvvatlash, ularning bandligini ta’minlash borasida qilinayotgan sa’y-harakatlar xonadonma-xonadon yurib ko‘rsatib berildi.

Shuningdek, tashrif doirasida keyingi manzil sifatida tumandagi “Krasniy Mayak” investori faoliyati bilan tanishildi. Bu yerda zamonaviy agrotexnologiyalar asosida dehqonchilik yo‘lga qo‘yilgani, xususan salat bargi va kartoshka yetishtirishda ilg‘or usullar qo‘llanilayotgani alohida e’tirof etildi. Investor tomonidan tashkil etilgan ushbu loyihalar nafaqat yuqori hosildorlikni ta’minlash, balki mahalliy aholi bandligini oshirishda ham muhim ahamiyat kasb etayotgani ta’kidlandi.

Mazkur tashrif va seminar doirasidagi uchrashuvlar pillachilik hamda qishloq xo‘jaligi sohalarini zamonaviy yondashuvlar asosida rivojlantirish, xotin-qizlarning ijtimoiy faolligini oshirish hamda hududlarda bandlikni ta’minlashga xizmat qilmoqda.