MAMLAKATIMIZ OZIQ-OVQAT XAVFSIZLIGINI TA’MINLASHDA O‘Z HISSANGIZNI QO‘SHING, AYNISA KARTOSHKA VA BOSHQA ZARUR MAHSULOTLARNI EKISHNI QISQA MUDDATDA YAKUNLAB, QO‘SHIMCHA DAROMADGA EGA BO‘LING!

Piskent tuman fermerlari kengashi Rayosati a’zolarining barcha mirishkor fermerlarga, bobo dehqonlarga hamda qishloq xo‘jaligi sohasiga tegishli korxonalarga
MUROJAATI

Hurmatli fermerlar, dehqonlar va qishloq xo‘jaligi sohasi fidoyilari!

Siz aziz dehqonlarning yaratuvchanlikka asoslangan mehnatingiz asrlar davomida xalqimizning farovon turmushi, to‘kin dasturxonining asosiy sababi sifatida yuksak e’tirof etilgan va qadrlangan.

Bugungi kunda oziq-ovqat xavfsizligini ta’minlash – nafaqat qishloq xo‘jaligini barqaror rivojlantirish, balki iqlim o‘zgarishlari ta’sirini yumshatish orqali aholi farovonligini oshirishning ustuvor yo‘nalishiga aylanmoqda.

Davlatimiz rahbari Navro‘z umumxalq bayrami tadbirida mirishkor dehqon va fermerlarimizga yuksak hurmat va ehtirom bildirib, ularning xalqimiz dasturxonini to‘kin va farovon qilishdek sharafli mehnatini e’tirof etdi hamda bu borada davlat va jamiyat tomonidan doimiy qo‘llab-quvvatlash davom ettirilishini ta’kidladi.

Ushbu qo‘llab-quvvatlashdan ruhlanib, oziq-ovqat xavfsizligini ta’minlash har birimizdan mas’uliyat va faollikni talab etayotgan eng dolzarb vazifalardan biri ekanligini his qilib, kartoshka, sabzavot va poliz mahsulotlarini qisqa muddatlarda ekishni tashkil etib, ichki ehtiyojni to‘liq qondirish orqali bozorlarda narxlar barqarorligini ta’minlashda o‘z hissamizni qo‘shaylik.

Har bir qarich yer – imkoniyat. Undan oqilona foydalanish esa nafaqat shaxsiy manfaat, balki yurtimiz farovonligiga qo‘shilgan hissadir, degan shior asosida har bir qarich yerimizga mahsulot ekishni tashkil etaylik.

Keling, birgalikda harakat qilib, xalqimiz dasturxonini to‘kin, yurtimizni yanada farovon qilaylik!

Himmati baland dehqon va fermerlar!

Mamlakatimiz aholisini qishloq xo‘jaligi mahsulotlari bilan ta’minlash, bozorlarda narx-navoning oshib ketishining oldini olish eng asosiy vazifamiz ekanligini unutmasligimiz zarur.

Oziq-ovqat mahsulotlarini yetishtirish strategik ahamiyatga ega bo‘lishi bilan bir qatorda, dehqon va fermerlarimiz uchun daromad manbai ham hisoblanadi. Ayniqsa, kartoshka yetishtirish nafaqat kundalik iste’mol mahsuloti, balki aholi iste’molida eng muhim oziq-ovqat mahsulotlaridan biridir.

Shu bois, mahsulot yetishtirish hajmini oshirish orqali narxlar barqarorligini ta’minlash, importga bo‘lgan qaramlikni kamaytirish bugungi kunning dolzarb vazifasidir.

“Dolzarb bir oylik” doirasida dala chetlari, bog‘ va qator oralari yerlaridan samarali foydalanib, kartoshka, sabzavot va poliz ekinlarini ekishni yakunlaylik.

Bundan tashqari, qo‘shimcha ravishda sabzavot ekinlarini ekib, hosildorlikni oshirish, mahsulot turlarini ko‘paytirish hamda xalqimiz dasturxonini to‘kin qilishga o‘z hissamizni qo‘shaylik.

Mirishkor va fidoyi fermerlar!

Mart-aprel oylarida, ya’ni “dolzarb bir oylik” davrida quyidagi tadbirlarni amalga oshirish zarur:

— har bir fermer xo‘jaligi tomonidan ekinlarni joylashtirish rejasiga muvofiq ochiq maydonlarda ekish ishlarini yakunlash;
— 10 kun muddatda dala chetlariga sabzavot, poliz va boshqa ekinlarni ekish;
— ilmiy-tadqiqot muassasalari bilan hamkorlikni kuchaytirish va sifatli urug‘lardan foydalanish;
— tijorat banklari orqali ajratilayotgan imtiyozli kreditlardan foydalanish;
— suv tejovchi texnologiyalarni joriy etish;
— kasallik va zararkunandalarga qarshi samarali kurashish hamda o‘g‘itlardan me’yorida foydalanish.

Hurmatli fermer va dehqonlar!

Barchangizni mavjud yer maydonlaridan samarali foydalanib, kartoshka va boshqa oziq-ovqat ekinlarini qisqa muddatlarda ekishni yakunlashga chaqiramiz.

Keling, yurtimiz taraqqiyoti yo‘lida birgalikda harakat qilaylik!

Piskent tuman fermerlari kengashi Rayosati a’zolari