Tumanda “yosh qutqaruvchi” musobaqasi o‘tkazildi

Piskent tumani Favqulodda vaziyatlar bo‘limi xodimlari tomonidan tumandagi 29-sonli umumiy o‘rta ta’lim maktabida yoshlarni harbiy-vatanparvarlik ruhida tarbiyalash, ularda fuqaro muhofazasi hamda yong‘in xavfsizligiga oid bilim, malaka va ko‘nikmalarni shakllantirish maqsadida “Yosh qutqaruvchi” musobaqasi tashkil etildi.

Mazkur musobaqadan ko‘zlangan asosiy maqsad – o‘quvchilarga favqulodda vaziyatlar sodir bo‘lgan taqdirda to‘g‘ri harakat qilish, o‘zi hamda atrofdagilarga birinchi yordam ko‘rsatish ko‘nikmalarini singdirish, shuningdek, ularni qutqaruvchilik kasbiga qiziqtirishdan iborat bo‘ldi.

Tadbir davomida ishtirokchilar yong‘in xavfsizligi qoidalari, fuqaro muhofazasi bo‘yicha amaliy mashg‘ulotlar hamda shartli vaziyatlarda tezkor va to‘g‘ri harakatlanish bo‘yicha o‘z bilim va mahoratlarini namoyish etdilar.

Musobaqa yakunida faol ishtirok etgan o‘quvchilar rag‘batlantirildi hamda ularga favqulodda vaziyatlarda hushyorlik va mas’uliyat muhim ahamiyat kasb etishi yana bir bor eslatib o‘tildi.