🇺🇿 O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llagan Murojaatnomasiga munosabat
2025-12-27 17:50:00 / Murojaatnoma
🇺🇿 O‘zbekiston Respublikasi Prezidenti Shavkat Mirziyoyevning Oliy Majlis va O‘zbekiston xalqiga yo‘llagan Murojaatnomasiga munosabat
O‘zbekiston Respublikasi Prezidenti Shavkat Mirziyoyev tomonidan Oliy Majlis va O‘zbekiston xalqiga yo‘llangan Murojaatnoma mamlakatimiz taraqqiyotining yangi bosqichini belgilab beruvchi, chuqur tahlil va aniq vazifalarga asoslangan muhim siyosiy hujjat bo‘ldi.
Davlat rahbari tomonidan 2026-yilning “Mahallani rivojlantirish va jamiyatni yuksaltirish yili” deb e’lon qilinishi mahalla tizimi vakillari uchun katta ishonch va mas’uliyatdir. Murojaatnomada mahallaning jamiyat hayotidagi o‘rni, aholi muammolarini hal etishdagi beqiyos ahamiyati, ijtimoiy adolatni ta’minlashdagi yetakchi roli alohida ta’kidlandi.
Bugungi kunda mahalla — fuqaroga eng yaqin bo‘lgan, aholining dardi va tashabbusini birlashtiruvchi muhim ijtimoiy institutga aylanmoqda. Prezidentimiz belgilab bergan ustuvor vazifalar mahallalarni yanada rivojlantirish, aholi bandligini ta’minlash, ehtiyojmand qatlamlarni qo‘llab-quvvatlash, yoshlar va xotin-qizlar bilan manzilli ishlashni yangi bosqichga olib chiqishga xizmat qiladi.
Piskent tumani Mahallalar uyushmasi bo‘limi jamoasi Prezident Murojaatnomasida belgilangan vazifalardan kelib chiqqan holda, mahalla tizimi faoliyatini yanada takomillashtirish, fuqarolar farovonligini oshirish, jamiyatda birdamlik va hamjihatlik muhitini mustahkamlash yo‘lida bor kuch va salohiyatini safarbar etadi.
Davlatimiz rahbari tomonidan ilgari surilgan tashabbuslar mahalla tizimini yanada kuchaytirishga, jamiyatni yuksaltirish orqali xalqimizning turmush darajasini oshirishga xizmat qilishiga ishonamiz.
Mahallalar uyushmasining
Piskent tumani bo‘limi boshlig‘i
Isamuhamedov Xikmat Boltaboyevich